"როდესაც საქმე ომსა და დიპლომატიას ეხება, ისევე როგორც ბიზნესში, აშშ-ის პრეზიდენტი დონალდ ტრამპი დეტალებზე არ ნერვიულობს. ის არც იმ სიღრმისეულ ანალიზსა და ექსპერტულ რჩევებს ეყრდნობა, რაც სხვა პრეზიდენტებისთვის ნორმა იყო. ის არის ლიდერი, რომელიც საკუთარ ინტუიციას მიჰყვება, რომელიც, როგორც თავად ამბობს: „ზოგჯერ იმაზე მეტს მეუბნება, ვიდრე სხვისი ტვინი მეტყვის ოდესმე“.აქამდე ტრამპი ახერხებდა ინტუიციაზე დაყრდნობით ფონს გასვლას. მისი მხრიდან ძალის გამოყენება იყო სწრაფი და შედეგიანი გასულ ივნისში ირანში და სულ რაღაც სამი თვის წინ ვენესუელაში. ის ასევე დაეხმარა კონფლიქტების დასრულებას, თუმცა იმ რვა ომიდან, რომელთა დასრულებასაც ის საკუთარ თავს მიაწერს, მათ შორის, ირონიულია, რომ ის ივნისში ისრაელსა და ირანს შორის ომსაც თვლის - უმეტესობა ან ისედაც მოგვარების პირას იყო, ან, როგორც კონგოს შემთხვევაში, რეალურად არც არასდროს დასრულებულა. ირანში კი მას ინტუიციამ საბოლოოდ უღალატა.ოთხკვირიანმა დაბომბვამ არ გამოიწვია ირანის რეჟიმის ან ქცევის ის სწრაფი ცვლილება, რასაც ტრამპის ინტუიცია მოელოდა. ამის ნაცვლად, თეირანმა სიტუაცია სათავისოდ შემოატრიალა: მიზანში ამოიღო ყურის ქვეყნები და ჩაკეტა ჰორმუზის სრუტე, რითაც რეგიონსა და მსოფლიოს სწრაფად მზარდი ხარჯები დააკისრა. ამით მან ტრამპს საბოლოოდ დაუპირისპირა მოწინააღმდეგე, რომელიც არ აპირებს მის ახირებებს დაემორჩილოს - 10,000 სამიზნის დაბომბვის შემდეგაც კი.ბევრისთვის, მათ შორის ტრამპის სამი წინამორბედისთვის ეს ყველაფერი მეტისმეტად პროგნოზირებადი იყო. სწორედ ამიტომ, თავის დროზე, მათ ყველამ დიპლომატია აირჩიეს ომის ნაცვლად, როდესაც ცდილობდნენ ირანისთვის ბირთვული იარაღის მოპოვება აღეკვეთათ. მაგრამ ტრამპი არ ჩაღრმავებია იმ დეტალებსა და ანალიზს, რამაც ყოფილი პრეზიდენტები - ჯორჯ ბუში, ბარაკ ობამა და ჯო ბაიდენი - დაარწმუნა, უარი ეთქვათ ირანის დაბომბვაზე, მათ შორის ისრაელის მხრიდან.ახლა კი მისი ინსტინქტი, რომ დაბომბვის კამპანია აღმოფხვრიდა საფრთხეს, რომლის წინაშეც აშშ-ის ყველა პრეზიდენტი იდგა ჯიმი კარტერის შემდეგ, მარცხდება. მისი სასოწარკვეთილი მცდელობები, აიძულოს ირანი დადოს შეთანხმება იმის მტკიცებით, რომ თეირანი მას „ეხვეწება“, და ელექტროსადგურების დაბომბვის მუქარისას ვადების მუდმივი გაგრძელება იმის ნიშანია, რომ ის აცნობიერებს: სულ უფრო მეტად არის გაჭედილი ორ ცუდ ვარიანტს შორის - სახმელეთო ჯარებით ესკალაციის აუცილებლობასა და იმ შეთანხმების მიღებას შორის, რომლის მოპოვებაც, სავარაუდოდ, ომის გარეშეც შეეძლო.ბევრმა მართებულად მიუთითა ირანის წინააღმდეგ ომის მომზადების, დაგეგმვისა და აღსრულების მრავალრიცხოვან ხარვეზებზე, რათა აეხსნათ, თუ რატომ აღმოჩნდა ტრამპი ამ მდგომარეობაში. თავად პრეზიდენტმა აღიარა, რომ გაკვირვებული იყო ირანის საპასუხო დარტყმით, ყურის მოკავშირეებზე თავდასხმითა და ჰორმუზის სრუტის ჩაკეტვით - მიუხედავად იმისა, რომ არაერთხელ გააფრთხილეს, რომ ირანი სწორედ ასე მოიქცეოდა.მაგრამ დიპლომატიაც, როგორც ომის წინა პერიოდში, ისე ახლა, ბევრ რამეს მოითხოვს. იმის ნაცვლად, რომ დაყრდნობოდა დიპლომატებს საჭირო მოლაპარაკების უნარებითა და გამოცდილებით ირანელ კოლეგებთან ურთიერთობისთვის, რომლებსაც, თავად მისი აღიარებითაც კი, „დიდი მოლაპარაკეები“ ჰქვია - ტრამპი დაეყრდნო მეგობრებსა და ოჯახის წევრებს, რომლებსაც აკლიათ საჭირო გამოცდილება და ცოდნა.პრეზიდენტი, მისი სიძე ჯარედ კუშნერი და მისი მეგობარი და საგანგებო დესპანი ახლო აღმოსავლეთში სტივ ვიტკოფი, დარწმუნებულნი არიან, რომ მათი კერძო სექტორის გამოცდილება, როგორც გარიგებების ოსტატების, მათ სრულყოფილ დიპლომატებად აქცევს. მაგრამ ამ ორი სფეროსთვის საჭირო უნარები ძალიან განსხვავებულია.კერძო სექტორში გარიგების დადებისას მხარეები თანხმდებიან ძირითად პუნქტებზე, დეტალებს კი იურისტებს უტოვებენ. დიპლომატიაში კი სტრატეგიულ და ისტორიულ კონტექსტს გადამწყვეტი მნიშვნელობა აქვს ისევე, როგორც იმის ცოდნას, თუ რა ამოძრავებს მეორე მხარეს, რაც ბევრად მეტია, ვიდრე უბრალოდ ფულის შოვნა. ამ ყველაფერს ვხედავთ ვიტკოფისა და კუშნერის საყვარელ მიდგომაში: წარადგინონ მრავალპუნქტიანი გეგმა - 28 პუნქტი უკრაინისთვის, 20 ღაზასთვის, 15 ირანისთვის - და შემდეგ სცადონ მეორე მხარის დაბნევა და იძულება, რომ ის მიიღოს. ამასთან, პუნქტები ხშირად ბუნდოვანია, მრავალგვარი ინტერპრეტაციის საშუალებას იძლევა და თითქმის ყოველთვის მოწყვეტილია იმ კონფლიქტის კონტექსტს, რომლის მოგვარებასაც ისახავს მიზნად.იდეა იმაში მდგომარეობს, რომ თუ ერთი მხარე „ფლობს კარტებს“, მეორე მხარე უნდა დანებდეს. მაგრამ დიპლომატია ასე არ მუშაობს.უკრაინაში 28 პუნქტი ძირითადად რუსეთის მიერ იყო შედგენილი და კიევმა ისინი კატეგორიულად უარყო. შემდეგ უკრაინასთან ერთად შემუშავებული ახალი 19-პუნქტიანი გეგმა, პროგნოზირებადია, რომ მოსკოვმა უარყო. დღეს, ის ხმამაღლა დაანონსებული მოლაპარაკებები, რომლებსაც ომი ერთ დღეში უნდა დაესრულებინა, შეჩერებულია და კონფლიქტი მეხუთე წელში შევიდა. ღაზაში ცეცხლის შეწყვეტა საბოლოოდ მიღწეულ იქნა და მძევლები გაათავისუფლეს, რაც ისრაელისა და აშშ-ის მთავარი მიზნები იყო. თუმცა მშვიდობა მაინც არ არის. ღაზას სექტორი ორად არის გაყოფილი, ერთ მხარეს ისრაელი აკონტროლებს, მეორეს კი ჰამასი. ჰამასს დემილიტარიზაცია არ მოუხდენია, ისრაელი კი თითქმის ყოველდღიურად არღვევს ცეცხლის შეწყვეტის შეთანხმებას.ირანთან უახლოეს მომავალში სამშვიდობო შეთანხმების მიღწევის პერსპექტივები არც თუ ისე უკეთესია. ბევრჯერ განხილული 15-პუნქტიანი გეგმა არის მაქსიმალისტური მოთხოვნების სია - მათ შორის სრული დენუკლეარიზაცია, რაკეტების მკაცრი შეზღუდვა და რეგიონული მარიონეტების მხარდაჭერის შეწყვეტა, რაც ირანმა მუდმივად უარყო.და მაშინაც კი, თუ დაბომბვის კამპანია საბოლოოდ დაარწმუნებდა თეირანის მმართველებს ომის დასასრულებლად მოლაპარაკებებზე, მათი ქვეყნის გამოცდილება ტრამპის ადმინისტრაციასთან ნებისმიერი სახის შეთანხმების მიღწევას უკიდურესად გაართულებს. ბოლოს და ბოლოს, ეს არის იგივე პრეზიდენტი, რომელიც 2015 წლის ბირთვული შეთანხმებიდან გავიდა, მიუხედავად იმისა, რომ ირანი მის პირობებს ასრულებდა. მეტიც, თეირანი ტრამპის ხელისუფლებაში დაბრუნების შემდეგ ორჯერ დათანხმდა არაპირდაპირ მოლაპარაკებებს - და ორჯერვე ეს მოლაპარაკებები შეწყდა ისრაელისა და აშშ-ის მიერ მათი ქვეყნისა და ხელმძღვანელობის დაბომბვის გამო.სინამდვილეში, ომის დაწყებამდე ირანი ჩართული იყო სერიოზულ დისკუსიებში ბირთვული პროგრამის შეზღუდვის შესახებ. მაგრამ ვიტკოფმა და კუშნერმა, როგორც ჩანს, ვერ გაიგეს იმ დათმობების არსი, რომლებისთვისაც ირანი მზად იყო - დათმობები, რომლებიც მოიცავდა გამდიდრების შეჩერებას და გამდიდრებული ურანის მარაგების შესაძლო გატანას. ვიტკოფმა ასევე მცდარად ჩათვალა, რომ ირანის დაჟინებული მოთხოვნა გამდიდრების უფლებასა და 440 კილოგრამი ურანის ფლობაზე, რაც საყოველთაოდ ცნობილი იყო - თითქოს ნიშნავდა, რომ ის შეთანხმებისთვის სერიოზულად განწყობილი არ იყო.ახლა ტრამპი საკუთარი ხელით შექმნილ სიტუაციაშია გაჭედილი. მისმა ინტუიციამ იმედი გააცრუა. მისმა მომლაპარაკებლებმა არ იციან, როგორ მოექცნენ მტკიცე მტერს, რომელიც საკუთარ გადარჩენას სხვებისთვის მაქსიმალური ტკივილის მიყენებით ცდილობს. ამის ფასს კი ჩვენ ყველანი ვიხდით".წყარო: Politico

1774871839

„ახლა ბურთი აშშ-ისა და რუსეთის მხარესაა. მე ძალიან მადლობელი ვარ ამერიკის იმისთვის, რომ ისინი აგრძელებენ ამ ფორმატს და, ღმერთმა ქნას, უახლოეს კვირებში ეს შესაძლებლობა გვქონდეს“, - განაცხადა ზელენსკიმ.პრეზიდენტმა კიდევ ერთხელ დაადასტურა, რომ უკრაინელები მზად არიან შეხვედრებისთვის „ნებისმიერ ფორმატში, ნებისმიერ ადგილას, რუსეთისა და ბელარუსის გარდა“, თუმცა ამჟამად სამმხრივი შეხვედრა გადადებულია იმის გამო, რომ „აშშ-ის ფოკუსი დღეს ირანზეა მიმართული“.„სამმხრივი შეხვედრა შედგება მაშინ, როდესაც ორივე მხარე – რუსეთიც და ამერიკაც - შეძლებს ჩვენთან შეხვედრას. რატომ ვამბობ ამას? იმიტომ, რომ დღეისათვის ამერიკამ შესთავაზა შეხვედრა აშშ-ში, რასაც ჩვენ მხარი დავუჭირეთ. რუსეთმა კი განაცხადა, რომ ამერიკაში არ ხვდება. რუსეთმა თურქეთი ან შვეიცარია შემოგვთავაზა (ზუსტად აღარ მახსოვს, რადგან სამი კვირა გავიდა). ამერიკამ თქვა, რომ ამჟამად მოლაპარაკებების ჯგუფი აშშ-ის ფარგლებს გარეთ არ გადის“, - განაცხადა ზელენსკიმ.უკრაინის პრეზიდენტმა დასძინა, რომ კიევი მზად არის მხარი დაუჭიროს შეხვედრას „აშშ-შიც, შვეიცარიაშიც, თურქეთშიც და ყველგან, სადაც პარტნიორები იქნებიან მზად“. მან ასევე აღნიშნა, რომ არ ფიქრობს, თითქოს სიტუაცია ახლა ჩიხშია შესული.„რუსეთი დანებდეს, ჩვენ არ ვაპირებთ. ჩვენ უნდა მოვაწყოთ სამმხრივი შეხვედრა და დიპლომატიური გზით წინ წავიდეთ. იმისთვის კი, რომ მოლაპარაკებების მაგიდასთან ძლიერები ვიყოთ, საჭიროა ძლიერები ვიყოთ ბრძოლის ველზე. მადლობელი ვარ შეიარაღებული ძალების, რომ დღეს ჩვენ ბევრად უფრო ძლიერები ვართ, ვიდრე ბოლო ნახევარი წლის განმავლობაში“, - თქვა პრეზიდენტმა.

1774865512

„კუბა იქნება შემდეგი. კუბა ქაოსშია. ეს არის წარუმატებელი სახელმწიფო. მოკლე დროში ის ჩამოიშლება — და ჩვენ იქ ვიქნებით, რომ დავეხმაროთ“, – განაცხადა ტრამპმა, ირანის შემდეგ შესაძლო ნაბიჯებზე საუბრისას.კითხვაზე, განიხილავს თუ არა აშშ ირანში სახმელეთო ჯარების შეყვანას, ტრამპმა უპასუხა: „მე ბევრი ალტერნატივა მაქვს“ და დეტალებზე არაფერი უთქვამს.მანამდე გავრცელდა ინფორმაცია, რომ აშშ-ის სანაპირო დაცვამ კუბისკენ მიმავალი რუსული ტანკერი, რომელიც დაახლოებით 730 ათას ბარელ ნავთობს ატარებს, არ შეაჩერა. ცნობების თანახმად, სანაპირო დაცვის კატერებს არ მიეცათ მითითება გემის შესაჩერებლად.ანალიტიკოსების შეფასებით, რუსული ტანკერის ჩასვლა კუბას ნავთობის მარაგებით სულ მცირე რამდენიმე კვირით უზრუნველყოფს.

1774855153

„შევხვდი ჩვენს სამხედრო ექსპერტებს, რომლებიც უკვე ერთ კვირაზე მეტია საუდის არაბეთში იმყოფებიან. ბიჭებმა მომახსენეს გუნდის მუშაობის პირველი შედეგები და დასკვნები როგორც ოპერაციულ, ისე უფრო ფართო დონეზე. ამ რეგიონში ჩვენი ექსპერტების ძირითადი ამოცანაა პრობლემური საკითხების გამოვლენა და იმ ცვლილებების განსაზღვრა, რომლებიც საჭიროა ადამიანებისა და სიცოცხლის დასაცავად ირანული „შაჰედებისა“ და რაკეტებისგან. მადლობელი ვარ მათი ოპერატიული და საფუძვლიანი მუშაობისთვის. არის კონკრეტული რამ, რაც შეგვიძლია ჩვენს პარტნიორებთან ერთად გავაკეთოთ“, - განაცხადა ზელენსკიმ.პრეზიდენტის თქმით, უკრაინელმა ექსპერტებმა მოკლე დროში მოასწრეს გამოცდილების გაზიარება და იმის ჩვენება, თუ როგორ იცავენ უკრაინაში ადამიანებსა და ინფრასტრუქტურას. ზელენსკიმ ხაზგასმით აღნიშნა, რომ უკრაინული ექსპერტიზა საჰაერო თავდაცვის სფეროში უნიკალურია, რადგან ის რეალურ საბრძოლო პირობებში ჩამოყალიბდა და უკვე დაამტკიცა საკუთარი ეფექტურობა.მან ასევე დასძინა, რომ უკრაინა მზად არის დაეხმაროს იმ სახელმწიფოების დაცვაში, რომლებიც მხარს უჭერენ მას დამოუკიდებლობისთვის ომში. შეხვედრაზე განიხილეს საუდის არაბეთში ცის თავდაცვის გასაძლიერებლად საჭირო საკვანძო საკითხები, პირველ რიგში, დრონების ჩამოგდების მიდგომები. ზელენსკიმ აღნიშნა, რომ უკრაინა მზად არის გრძელვადიანი და ურთიერთხელსაყრელი თანამშრომლობისთვის.26 მარტს უკრაინის პრეზიდენტი ვოლოდიმირ ზელენსკი ვიზიტით საუდის არაბეთში ჩავიდა. მანამდე ცნობილი გახდა, რომ უკრაინელი ექსპერტები უსაფრთხოებისა და უპილოტო საფრენი აპარატების წინააღმდეგ ბრძოლის საკითხებში იმყოფებოდნენ კატარში, არაბთა გაერთიანებულ საამიროებსა და საუდის არაბეთში.

1774602652

გამოცემის ინფორმაციით, ხუთშაბათს გამართული მოლაპარაკებების შემდეგ მინიმუმ ორმა ბიზნესმენმა დაუდასტურა პუტინს მზადყოფნა, თავდაცვის ბიუჯეტში შენატანები განახორციელონ.ცნობილია, რომ პუტინი აგრძელებს ინტერვენციას მას შემდეგ, რაც უკრაინამ აშშ-ის შუამავლობით გამართული ბოლო მოლაპარაკებებისას დონბასიდან ცალმხრივად გასვლაზე უარი განაცხადა. კრემლის სპიკერმა დმიტრი პესკოვმა აღნიშნა, რომ რუსეთი დაუკავშირდება აშშ-ს სამშვიდობო მოლაპარაკებების ახალ რაუნდთან დაკავშირებით, როგორც კი პირობები ამის საშუალებას მისცემს. პესკოვის თქმით, რუსეთს სამშვიდობო მოლაპარაკებებისადმი ინტერესი არ დაუკარგავს, თუმცა დასძინა, რომ ძირითადი საკითხები, მათ შორის ტერიტორიული, ჯერ კიდევ მოსაგვარებელია.The Guardian წერს, რომ კრემლის თავდაცვის ხარჯები გასულ წელს 42%-ით გაიზარდა და 13.1 ტრილიონ რუბლს (121 მლრდ ფუნტი სტერლინგი) მიაღწია, რის გამოც ხელისუფლება ეკონომიკის სტაბილიზაციას გადასახადების მეშვეობით ცდილობს. ეკონომიკის მინისტრმა მაქსიმ რეშეტნიკოვმა ხუთშაბათს განაცხადა, რომ რუსეთი განიხილავს წელს ზემოგებაზე კიდევ ერთი გადასახადის (windfall tax) დაწესებას, თუ რუბლის გაუფასურება გაგრძელდება. 2023 წელს რუსეთმა მსხვილ კომპანიებზე დაწესებული ერთჯერადი 10%-იანი მოსაკრებლით 320 მლრდ რუბლი (2.95 მლრდ ფუნტი სტერლინგი) მოიზიდა.იანვარში კრემლმა დამატებული ღირებულების გადასახადი (დღგ) 22%-მდე გაზარდა, რათა მცირე და საშუალო ბიზნესიდან სამი წლის განმავლობაში დამატებით 600 მლრდ რუბლი მიიღოს. იანვარსა და თებერვალში რუსეთის ბიუჯეტის დეფიციტმა მთელი წლისთვის დაგეგმილი მაჩვენებლის 90%-ს გადააჭარბა, რადგან აშშ-ის სანქციებმა მოსკოვი აიძულა ნავთობი მნიშვნელოვანი ფასდაკლებით გაეყიდა. მანამდე პუტინმა გააფრთხილა რუსული კომპანიები და მთავრობა, რომ ყურადღებით მიუდგნენ იმ ზემოგების ხარჯვას, რომელიც ახლო აღმოსავლეთში ომის გამო ნავთობის ფასების ზრდის შედეგად მიიღეს.მოსკოვში ბიზნესლიდერებთან შეხვედრისას პუტინმა აღნიშნა, რომ მიუხედავად ექსპორტზე ფასების მატებისა, ბაზრები არასტაბილურია და საჭიროა ზომიერი კონსერვატიზმი როგორც კორპორაციულ სექტორში, ისე სახელმწიფო ფინანსებში, რათა დამატებითი შემოსავლები დივიდენდებზე ან ბიუჯეტის ხარჯების გაფართოებაზე არ დაიხარჯოს.ოთხშაბათს უკრაინის პრეზიდენტმა, ვოლოდიმირ ზელენსკიმ Reuters-ს განუცხადა, რომ აშშ სამშვიდობო შეთანხმებისთვის უსაფრთხოების გარანტიების შეთავაზებას კიევის მიერ დონბასის მთელი რეგიონის რუსეთისთვის დათმობის სანაცვლოდ აკეთებს.ზელენსკის თქმით, ახლო აღმოსავლეთის მოვლენებს გავლენა აქვს პრეზიდენტ ტრამპზე, რომელიც კვლავ უკრაინულ მხარეზე ზეწოლის სტრატეგიას ირჩევს. მას იმედი აქვს, ამერიკული მხარე გააცნობიერებს, რომ ქვეყნის აღმოსავლეთი ნაწილი უკრაინის უსაფრთხოების გარანტიების განუყოფელი ნაწილია.

1774597454

გამოცემის ინფორმაციით, არაბთა გაერთიანებული საამიროები მზად არიან შეუერთდნენ და აქტიური მონაწილეობა მიიღონ ნებისმიერ მრავალეროვნულ სამხედრო კოალიციაში, რომელიც შესაძლოა ჰორმუზის სრუტეში განლაგდეს. ქვეყანა ბაჰრეინთან ერთად ასევე მუშაობს გაეროს უშიშროების საბჭოს რეზოლუციის პროექტზე, რომელიც ასეთი ოპერაციების ჩატარებას საერთაშორისო მანდატს მისცემს.Financial Times ხაზს უსვამს, რომ საუბარი არ არის ირანთან ომის დაწყებაზე.არაბთა გაერთიანებული საამიროების ხელისუფლება მოლაპარაკებებს აწარმოებს საუდის არაბეთთან, რათა ერ-რიადმა მხარი დაუჭიროს ამ ინიციატივას. ბაჰრეინი, გამოცემის თანახმად, სრულად უჭერს მხარს გეგმას.სპარსეთის ყურის სხვა ქვეყნებს ჯერჯერობით საბოლოო გადაწყვეტილება არ მიუღიათ შესაძლო ოპერაციებში მონაწილეობის შესახებ. ერთ-ერთი მიზეზი ისაა, რომ მათ ეშინიათ აშშ-ის მხრიდან შესაძლო „მოულოდნელი გასვლის“ და არაბული სახელმწიფოების ირანთან პირისპირ დარჩენის.გარდა ამისა, წყაროები აცხადებენ, რომ რეგიონის ქვეყნებმა შესაძლოა დააჩქარონ მილსადენებისა და რკინიგზის ინფრასტრუქტურის მშენებლობის პროექტები, რათა ენერგომატარებლები ხმელეთით მიაწოდონ ომანში ან ხმელთაშუა ზღვის რეგიონში.

1774595292

ტრამპმა თავის სოციალურ ქსელ Truth Social-ზე დაწერა: „ირანელი მომლაპარაკებლები ძალიან უცნაურები არიან. ისინი გვემუდარებიან, რომ მათთან შეთანხმება დავდოთ, რასაც უნდა აკეთებდნენ კიდეც, რადგან სამხედრო თვალსაზრისით განადგურდნენ. მიუხედავად ამისა, საჯაროდ აცხადებენ, რომ „ჩვენს წინადადებას განიხილავენ“. ეს არასწორი საქციელია! სჯობს, საქმეს სერიოზულად მიუდგნენ, ვიდრე ძალიან გვიანი არ არის, რადგან როგორც კი ეს მოხდება, უკან დასახევი გზა აღარ იარსებებს და ეს სასიამოვნო არ იქნება“.ირანის საგარეო საქმეთა მინისტრმა აბას არაღჩიმ კი განაცხადა, რომ აშშ-სა და ირანს შორის მოლაპარაკებები არ მიმდინარეობს. მისი თქმით, ბოლო დღეებში თეირანმა „მეგობრული ქვეყნების“ მეშვეობით რამდენიმე შეტყობინება მიიღო, თუმცა ეს მხოლოდ შეტყობინებების გაცვლაა და არა დიალოგი ან მოლაპარაკებები.„იმ ფაქტს, რომ შეტყობინებები იგზავნება და ჩვენ გაფრთხილებით ვპასუხობთ ან ვაცხადებთ ჩვენს პოზიციებს, არ ჰქვია მოლაპარაკება ან დიალოგი; ეს არის შეტყობინებების გაცვლა“, - აღნიშნა არაღჩიმ.ტრამპის განცხადება გაკეთდა იმ ფონზე, როდესაც აშშ-სა და ირანს შორის დაძაბულობა კვლავ მაღალია, ხოლო ორივე მხარე საჯაროდ განსხვავებულ სურათს წარმოადგენს მიმდინარე კომუნიკაციების შესახებ.

1774530063

რუსეთს ბრალად ედება გემების მართვა ვალიდური ეროვნული დროშის გარეშე, რათა თავი აარიდოს ნავთობზე დაწესებულ სანქციებს და დაეხმაროს უკრაინაში მისი ომის დაფინანსებას.მინისტრებმა იანვარში გამოავლინეს სამართლებრივი საფუძველი, რომელიც სამხედრო ძალებს საშუალებას მისცემს ავიდნენ სანქცირებულ გემებზე გაერთიანებული სამეფოს წყლებში. მიუხედავად იმისა, რომ ჯერჯერობით არცერთ გემზე არ განხორციელებულა ასვლა, ცნობილია, რომ პირველი ასეთი ოპერაცია მალე მოხდება.კირ სტარმერმა განაცხადა, რომ ეს ნაბიჯი „პუტინის სამხედრო მანქანას წაართმევს იმ ბინძურ მოგებას, რომელიც მის ბარბაროსულ კამპანიას აფინანსებს“.მინისტრებს სურთ ხაზი გაუსვან საფრთხეს, რომელიც კვლავ მომდინარეობს რუსეთისგან, მიუხედავად იმისა, რომ ბოლო კვირებში უაითჰოლის (Whitehall) ყურადღების დიდი ნაწილი ფოკუსირებული იყო ახლო აღმოსავლეთის ომზე.BBC-ის ინფორმაციით, გემებზე ასვლის ნებართვა მას შემდეგ გაიცა, რაც პრემიერ-მინისტრი ფინეთში ჩავიდა გაერთიანებული საექსპედიციო ძალების (JEF) სამიტზე ჰელსინკიში - ეს არის ჩრდილოეთ ევროპის ქვეყნების სამხედრო კოალიცია. სტარმერი სამიტზე სიტყვით დღეს, 26 მარტს გამოვა.სამეფო ფლოტის პერსონალი ბოლო კვირების განმავლობაში ეხმარებოდა ისეთ ქვეყნებს, როგორიცაა ფინეთი, შვედეთი და ესტონეთი, ჩრდილოვანი ფლოტის გემების მონიტორინგსა და თვალთვალში.გაერთიანებული სამეფოს სამხედრო პერსონალი ჯერჯერობით არცერთ გემზე არ ასულა, თუმცა მთავრობის მაღალჩინოსნებს სურთ, რომ ეს შეიცვალოს. სპეციალური სამხედრო ნაწილები ბოლო კვირებში გადიოდნენ წვრთნებს სხვადასხვა სცენარების გასათამაშებლად, მათ შორის, თუ როგორ უნდა მოიქცნენ შეიარაღებული ეკიპაჟების შემთხვევაში.ცნობილია, რომ ეს წვრთნები უკვე დასრულებულია და თავდაცვის სამინისტროს ოფიციალური პირები მუშაობენ დაშვებაზე, რომ ამ ტიპის პირველი ოპერაცია უფრო ადრე მოხდება, ვიდრე გვიან.ოპერაციაში მონაწილეები შეიძლება იყვნენ სპეციალური საზღვაო სამსახური (Special Boat Service) და სამეფო საზღვაო ქვეითები (Royal Marines), რაც დამოკიდებული იქნება ჩრდილოვანი გემების ეკიპაჟების მხრიდან მოსალოდნელი წინააღმდეგობის დონეზე.BBC-ის ცნობით, მთავრობას სჯერა, რომ რუსეთის ნედლი ნავთობის დაახლოებით 75% გადაიზიდება მოძველებული გემებით და სანქციები დააწესა 544 ხომალდზე, რომლებიც ჩრდილოვანი ფლოტის წევრებად მიიჩნევიან.გემების თვალთვალის ტექნოლოგია შეიძლება გამოყენებულ იქნეს იმის დასადგენად, თუ რომელი სანქცირებული გემები მიემართებიან გაერთიანებული სამეფოს წყლებისკენ მათ მოსვლამდე რამდენიმე კვირით ადრე.როგორც ცნობილია, სამხედრო დამგეგმავები და თავდაცვის ოფიციალური პირები აკვირდებიან თვალთვალის ამ სისტემებს, რათა დაადგინონ, რომელი ხომალდები იქნებიან პირველები, რომლებზეც მოხდება ასვლა და დაკავება.წლის დასაწყისში ბრიტანეთის შეიარაღებული ძალები დაეხმარნენ აშშ-ის ჯარებს ნავთობის ტანკერ Marinera-ს დაკავებაში, რომელსაც ამერიკელი მაღალჩინოსნები სანქციების დარღვევაში ადანაშაულებდნენ ვენესუელის, რუსეთისა და ირანისთვის ნავთობის გადაზიდვის გამო.ამის შემდეგ მინისტრებმა დაიწყეს იმის შესწავლა, თუ როგორ შეეძლოთ ბრიტანულ ძალებს მსგავსი ოპერაციების წარმართვა გაერთიანებული სამეფოს წყლებში მოძრავი სანქცირებული გემების წინააღმდეგ. მთავრობის იურისტებმა 2018 წლის სანქციებისა და ფულის გათეთრების შესახებ აქტი (Sanctions and Money Laundering Act) განსაზღვრეს, როგორც სამართლებრივი საშუალება, რომელიც სამხედრო ძალის გამოყენების ნებას იძლევა.თუმცა, BBC Verify-ის ანალიზმა აჩვენა, რომ ათეულობით სანქცირებულმა გემმა გაიარა ლა-მანშის სრუტეში იმ კვირების განმავლობაში, როდესაც ეს სამართლებრივი მექანიზმი უკვე იდენტიფიცირებული იყო.თავდაცვის მდივანი ჯონ ჰილი და გენერალური პროკურორი ლორდ ჰერმერი ბოლო კვირებში შეხვდნენ თავიანთ კოლეგებს გაერთიანებული საექსპედიციო ძალებიდან, რათა დეტალურად განეხილათ ზუსტი სამართლებრივი შედეგები სხვადასხვა ტიპის სცენარებისთვის.JEF-ის სამიტის წინ საუბრისას სტარმერმა თქვა, რომ მსოფლიო ხდება „სულ უფრო არასტაბილური და საშიში“.მან დასძინა: „პუტინი ხელებს იფშვნეტს ახლო აღმოსავლეთში მიმდინარე ომის გამო, რადგან ფიქრობს, რომ ნავთობის მაღალი ფასები მას ჯიბეების გასქელების საშუალებას მისცემს. სწორედ ამიტომ, ჩვენ კიდევ უფრო ძლიერად ვუტევთ მის ჩრდილოვან ფლოტს; არა მხოლოდ ბრიტანეთის უსაფრთხოების დასაცავად, არამედ პუტინის სამხედრო მანქანისთვის იმ ბინძური მოგების წასართმევად, რომელიც უკრაინაში მის ბარბაროსულ კამპანიას აფინანსებს“.კონსერვატიული პარტიის წარმომადგენელმა განაცხადა: „ნებისმიერი ძალისხმევა, რომ სანქცირებული გემები ჩვენი წყლებიდან შორს დავიჭიროთ, მნიშვნელოვანია. მაგრამ ლეიბორისტების წარუმატებლობა, მხარი დაუჭირონ ჩვენს შეიარაღებულ ძალებს საჭირო რესურსებით, აჩვენებს, რომ ის უარყოფს იმ საფრთხეების მასშტაბებს, რომელთა წინაშეც ჩვენი ქვეყანა დგას“.

1774514508

„უნგრეთიდან უკრაინისთვის გაზის მიწოდება ეტაპობრივად შეწყდება, ხოლო გაზის ის მოცულობა, რომელიც უნგრეთში დარჩება, შენახული იქნება უნგრეთში“, - განაცხადა ორბანმა.პრემიერ-მინისტრმა აღნიშნა, რომ შესაბამისი წინადადება მთავრობის უახლოეს სხდომაზე იქნება წარდგენილი.ორბანის თქმით, უკრაინა ბლოკავს ნავთობსადენ „დრუჟბას“ მუშაობას: „ჯერჯერობით ჩვენ წარმატებით ვიცავთ თავს უკრაინული შანტაჟისგან. დაცული ფასების წყალობით, უნგრელები ყველაზე დაბალ ფასს იხდიან ბენზინგასამართ სადგურებზე. ჩვენ უნდა განვაგრძოთ სვლა, რათა გავარღვიოთ ნავთობის ბლოკადა და უნგრეთი უსაფრთხო ენერგომომარაგებით უზრუნველვყოთ“.„სანამ უკრაინა ნავთობს არ მოგვცემს, ის უნგრეთისგან გაზს ვერ მიიღებს“, - ხაზგასმით აღნიშნა პრემიერმა. მან ასევე დაამატა, რომ ვინაიდან უკრაინა ასევე „უტევს სამხრეთის გაზსადენს, რომელიც უნგრეთს ამარაგებს, ჩვენ უნდა შევქმნათ რეზერვები, ამიტომ უნგრულ გაზსაცავებს უკრაინულების ნაცვლად შევავსებთ. ჩვენ დავიცავთ უნგრეთის ენერგეტიკულ უსაფრთხოებას, შევინარჩუნებთ ბენზინზე დაცულ ფასს და გაზზე შემცირებულ ტარიფს!“„Европейская правда“ იუწყებოდა, რომ ევროკავშირმა მიესალმა უკრაინის ვალდებულებას, ექვსი კვირის განმავლობაში შეაკეთოს რუსული რაკეტით დაზიანებული ნავთობსადენი „დრუჟბა“. მანამდე ევროკავშირმა გამოთქვა მზადყოფნა ფინანსური რესურსებისა და ექსპერტული მხარდაჭერის მობილიზებაზე, რათა უნგრეთსა და სლოვაკეთში ნავთობის მიწოდება აღდგეს.ბრიუსელში გამართულ ევროპულ საბჭოზე ვიქტორ ორბანმა განაცხადა, რომ უნგრეთი არ დაბლოკავს უკრაინისთვის არცერთ ხელსაყრელ გადაწყვეტილებას მანამ, სანამ „დრუჟბა“ რუსული ნავთობის ტრანსპორტირებას არ განაახლებს.უნგრეთის საგარეო საქმეთა მინისტრმა, პეტერ სიიარტომ კი აღნიშნა, რომ უკრაინა იძულებული გახდება აღადგინოს რუსული ნავთობის მიწოდება, რადგან მას „ფული გამოელევა“.

1774435020

„ამერიკელები ვერ ხედავენ, სად შეიძლება შევთანხმდეთ მთავარ საკითხზე. ამან შესაძლოა აიძულოს ისინი საერთოდ გავიდნენ პროცესიდან, გადაერთონ ირანზე, თავიანთ არჩევნებზე და ა.შ. ისინი მზად არიან ჩვენთვის უსაფრთხოების რეალური გარანტიებიც კი გასცენ, თუ დონბასიდან გამოვალთ. მაგრამ როგორ უნდა განხორციელდეს ეს უკრაინაში, უბრალოდ ვერ წარმომიდგენია“, - ამბობს ზელენსკის გუნდის ერთ-ერთი წევრი, რომელსაც საშუალება ჰქონდა გასცნობოდა 21–22 მარტის მოლაპარაკებების ბოლო რაუნდის შედეგებს.Українська правда წერს, აღინიშნება, რომ სამოლაპარაკო პროცესს რეალური სტარტი ტრამპისა და პუტინის საზაფხულო შეხვედრაზე, ანკორიჯში მიეცა. ამჟამად რუსეთი მუდმივად უბრუნდება აშშ-ის პრეზიდენტთან ანკორიჯში მიღწეულ „შეთანხმებებს“, რაც ბლოკავს უკრაინასთან რეალური სამოლაპარაკო პროცესის განვითარებას.„შეხვედრებზე თითქოს სამი მხარე ზის, მაგრამ უკრაინა მუდმივად ამ ანკორიჯზე კამათობს. ანუ, რაზეც არ უნდა ვსაუბრობდეთ, ყველაფერი იქამდე მიდის, რომ ამერიკელები გვეუბნებიან: ‚გამოდით დონბასიდან და ჩვენ აგიშენებთ სამოთხეს, როგორც ალასკაზე შევთანხმდით‘. სამოლაპარაკო პროცესის მთავარი პუნქტი დონეცკის ოლქში უკრაინული ძალების საკითხია", - ამბობს ზელენსკის გუნდის წევრი და იქვე დასძენს, - „ჩვენები დიდ დროს ხარჯავენ იმაზე, რომ ამერიკელები როგორმე ჯარების გაყვანის იდეიდან ეკონომიკური ზონების შექმნის ან სხვა რამისკენ გადაიყვანონ. მაგრამ რაღაც მომენტში კვლავ ყველაფრის უარყოფა გვესმის: "უნდა გამოხვიდეთ", და ასე, წრეზე“.გარდა ამისა, უკრაინა დამოკიდებულია მოკავშირეების ფინანსურ მხარდაჭერაზე.„ევროპელები იფიცებიან, რომ ფული იქნება და უნგრეთის წინააღმდეგობას როგორმე გვერდს აუვლიან. ჩვენ ჯერჯერობით საკუთარ ბიუჯეტს ვიყენებთ, მაგრამ თუ ევროკავშირი ვერაფერს მოიფიქრებს, წლის მეორე ნახევარში შეიძლება აღმოჩნდეს, რომ არმიისთვის ფული კიდევ ცოტა გვაქვს, სოციალური გასაცემლებისთვის კი - აღარ. და ამ დროს საერთოდ გაურკვეველი იქნება, რა უნდა ვქნათ... ამიტომ, ცხადია, რომ ბუდანოვი და არახამია უნდა დადიოდნენ, უნდა ლაპარაკობდნენ, ეძებდნენ ფორმულირებებს. იმდენ ხანს, რამდენიც საჭირო იქნება. წინააღმდეგ შემთხვევაში, წინ კიდევ რამდენიმეწლიანი ომია და უკვე აშშ-ის გარეშე. არიან კი ადამიანები ამისთვის მზად? - მეშინია, რომ არა“, - ამბობს ზელენსკის გუნდის ერთ-ერთი წარმომადგენელი.22 მარტს, უკრაინისა და აშშ-ის მომლაპარაკებლების შეხვედრების შემდეგ, პრეზიდენტმა ვოლოდიმირ ზელენსკიმ განაცხადა, რომ არის სიგნალები უკრაინასა და რუსეთს შორის გაცვლების შესაძლო გაგრძელების შესახებ.21 მარტს უმეროვმა განაცხადა, რომ უკრაინისა და აშშ-ის წარმომადგენლებმა ფლორიდაში გააგრძელეს შემდგომი ნაბიჯების განხილვა სამოლაპარაკო ტრეკის ფარგლებში, ხოლო ვიტკოფმა უკრაინული და ამერიკული დელეგაციების შეხვედრას, რომელიც „გადაუჭრელი საკითხების წრის შევიწროებას“ ეხებოდა, კონსტრუქციული უწოდა.პრეზიდენტის ოფისის ხელმძღვანელმა და რუსებთან უკრაინის სამოლაპარაკო ჯგუფის წევრმა, კირილო ბუდანოვმა განაცხადა, რომ რუსული მხარე დათანხმდა უკრაინისთვის აშშ-ისგან უსაფრთხოების გარანტიების მიღებას. მან ასევე ისაუბრა სამხედრო ქვეჯგუფში მოლაპარაკებების პროგრესზე.

1774342089