ერთდღიანი ვიზიტების კლება დაკავშირებულია მეზობელი ქვეყნებიდან ნაკადების შესუსტებასთან. მოკლევადიანი ვიზიტები ძირითადად სწორედ ამ ქვეყნებთანაა დაკავშირებული. მიუხედავად იმისა, რომ ვიზიტები თურქეთიდან და რუსეთიდან გაიზარდა, ნაკადები სომხეთიდან და აზერბაიჯანიდან შემცირდა 11.2%-ით და 8.1%-ით, შესაბამისად, რამაც განაპირობა ერთდღიან ვიზიტებში ცვლილება.საინვესტიციო კომპანიის მიმოხილვის თანახმად, 1Q26-ში, თურქეთი გახდა საერთაშორისო ვიზიტების ყველაზე მნიშვნელოვანი წყარო, ვიზიტების 20.4% შეადგინა და გაუსწრო რუსეთს. რუსეთი 19.7%-ით მეორე ადგილზე გადავიდა, ხოლო სომხეთი 13.7%-ით მესამე ადგილს იკავებს.წლიური ზრდის დინამიკა ძირითადი ბაზრებისთვის განსხვავდებოდა. თურქეთიდან და რუსეთიდან ვიზიტები შესაბამისად 6%-ით და 5%-ით გაიზარდა. მაშინ, როცა ისრაელიდან ვიზიტები 17.5%-ით დაეცა, რაც ახლო აღმოსავლეთში მიმდინარე კონფლიქტის ეფექტს ასახავს. მიუხედავად ამისა, ისრაელი მეოთხე უმსხვილეს ბაზრად რჩება.საერთაშორისო ვიზიტებიმიუხედავად იმისა, რომ ცალკეული ევროპული ქვეყნები საქართველოს მეზობლებს ჩამოუვარდებიან საერთაშორისო ვიზიტების რაოდენობით, 2026 წლის პირველ კვარტალში ევროკავშირმა და გაერთიანებულმა სამეფომ ერთობლივად საერთო ვიზიტების 8.2% შეადგინა და გაუსწრო ისეთ მნიშვნელოვან ბაზრებს, როგორიცაა ისრაელი და აზერბაიჯანი.აღნიშნული ბაზრიდან ყველაზე მნიშვნელოვანი კონტრიბუტორები იყვნენ გერმანია (15%), პოლონეთი (14%) და გაერთიანებული სამეფო (10%). ამასთანავე, ყველა ძირითადი ევროპული ბაზრიდან ვიზიტებმა ზრდა განაგრძო 1Q26-შიც, რაც აღნიშნულ ბაზრებზე საქართველოს მზარდ პოპულარობაზე მიანიშნებს.თიბისი კაპიტალის კვლევის მიხედვით, მნიშვნელოვანი პოზიტიური ცვლილებები დაფიქსირდა უკრაინიდან (+24%) და ჩინეთიდან (+47%). თუმცა, მნიშვნელოვნად შემცირდა ვიზიტები ინდოეთიდან (-30%), რაც კავშირშია ინდოეთიდან საქართველოს მიმართულებით, ახლო აღმოსავლეთში მიმდინარე კონფლიქტის გამო, შეჩერებულ პირდაპირ რეისებთან.საერთაშორისო მოგზაურობიდან მიღებული შემოსავლებისაერთაშორისო ვიზიტებიდან მიღებულმა შემოსავალმა 1Q26-ში $830 მლნ შეადგინა, რაც 0.5%-იანი ზრდაა წლიურ ჭრილში.ტურისტული შემოსავლის ყველაზე მნიშვნელოვანი წყარო ევროკავშირი და გაერთიანებული სამეფო გახდა, მიუხედავად იმისა, რომ ეს ბაზარი ტურისტული ნაკადებით მე-4 ადგილს იკავებს. რაც ნიშნავს რომ ვიზიტორები ევროკავშირიდან და გაერთიანებული სამეფოდან საშუალოდ მეტს ხარჯავენ სხვა ძირითად ბაზრებთან შედარებით.მიუხედავად იმისა, რომ სომხეთიდან და აზერბაიჯანიდან მნიშვნელოვნად შემცირდა ვიზიტორთა ნაკადები, ტურიზმიდან მიღებულ შემოსავლებზე ძირითადი ზეწოლა რუსეთმა და ისრაელმა გამოიწვია (-12% და -13% კლება შესაბამისად).შემოსავლების ზრდა დაფიქსირდა ევროკავშირის და გაერთიანებული სამეფოს, თურქეთისა და უკრაინის ბაზრებიდან, რამაც დააბალანსა ზემოთ ხსენებული ნეგატიური დინამიკა და მთლიანი საერთაშორისო მოგზაურობიდან მიღებული შემოსავლების მცირედი ზრდა უზრუნველყო.ახლო აღმოსავლეთთან დაკავშირებული ბაზრები ტურისტული შემოსავლის თვალსაზრისით კვლავ მნიშვნელოვნად რჩება. ვიზიტორთა ნაკადების შესუსტების მიუხედავად, ტურისტულ შემოსავლებში წილით ისრაელი მოწინავე პოზიციას ინარჩუნებს და მესამე ადგილს იკავებს. რაც შეეხება საუდის არაბეთს, მან ყველაზე დიდი წლიური ზრდა დააფიქსირა (+48%).სასტუმროები საქართველოში1Q26-ში, წლიურად, დიდ ბრენდულ სასტუმროებში დატვირთულობა გაიზარდა 6 პ.პ.-ით და 51% შეადგინა. ზრდა ყველაზე შესამჩნევი იყო იანვარში, თებერვალლისა და მარტისგან განსხვავებით.სასტუმროების დატვირთულობის პოზიტიური დინამიკა თანხვედრაშია ტურისტული ვიზიტების ზრდასთან. თუმცა თებერვლისა და მარტის მონაცემები ახლო აღმოსავლეთში მიმდინარე მოვლენებით გამოწვეულ შოკს ასახავს.ამასთან, დიდ ბრენდულ სასტუმროებში ნომრების საშუალო ღირებულებაც გაიზარდა. 1Q26-ში ტარიფმა $129-ს მიაღწია, რაც წლიურად 10%-იან ზრდას ნიშნავს. აღსანიშნავია, რომ მიმდინარე წლის პირველ სამ თვეში სტაბილურად მზარდი ტარიფები დაფიქსირდა.

1779959238

ვაზისა და ღვინის საერთაშორისო ორგანიზაციის (OIV) თანახმად, გასულ წელს ფრანგებმა 22 მილიონი ჰექტოლიტრი ღვინო დალიეს, რაც ოდნავ ჩამოუვარდება საფრანგეთის ლუდის მწარმოებელთა ასოციაციის მიერ დაფიქსირებულ 22,1 მილიონ ჰექტოლიტრ ლუდს.ეს მაჩვენებელი ღვინის მოხმარების ბოლო 70 წლის მინიმუმს ასახავს, რაც 2024 წელთან შედარებით 3.2%-ით არის შემცირებული. კვლევის ავტორების თქმით, ეს არის გრძელვადიანი კლებადი ტენდენცია, რომელიც უკვე რამდენიმე ათწლეულს ითვლის.მიუხედავად იმისა, რომ 2025 წელს საფრანგეთი კვლავ დარჩა ღვინის უმსხვილეს მომხმარებლად ევროპაში, მისი მაჩვენებლები ხუთწლიან საშუალო მაჩვენებელთან შედარებით 7.2%-ით ნაკლები იყო.ექსპერტების განცხადებით, ეს ზოგადი ტენდენცია განპირობებულია ღვინის მომწიფებულ ბაზრებზე არსებული რთული ეკონომიკური პირობებისა და თაობებს შორის ქცევის ცვლილების ერთობლიობით. OIV-ის თანახმად, საერთო მოხმარებამ ბოლო 60-ზე მეტი წლის განმავლობაში ყველაზე დაბალ ნიშნულს მიაღწია, ამასთანავე, აშშ-ის ტარიფებმა გლობალურ ღვინის ვაჭრობაზე წნეხი გაზარდა.„ის, რასაც 2025 წლის მონაცემებში ვხედავთ, არის სექტორი, რომელიც რეაგირებს აშშ-ის სატარიფო პოლიტიკის რეალურ დროში არსებულ გავლენაზე, თუმცა ასევე ადაპტირდება კლიმატისა და მოხმარების კუთხით მიმდინარე გრძელვადიან ცვლილებებთან“, - განაცხადა OIV-ის გენერალურმა დირექტორმა, ჯონ ბარკერმა.ამავდროულად, საფრანგეთის ლუდის მწარმოებელთა ასოციაციის (Brasseurs de France) თანახმად, საფრანგეთში შედარებით იაფ ლუდზე მოთხოვნა სტაბილური დარჩა და ღვინის მოხმარების მაჩვენებელს ოდნავ გადაასწრო. გასულ წელს უალკოჰოლო ლუდის მოხმარებაც 12%-ით გაიზარდა - მხოლოდ გასული წლის ივლისსა და აგვისტოში 600 000 ლიტრი იქნა მოხმარებული.ანალიტიკოსების აზრით, ეს ცვლილებები შესაძლოა ნაწილობრივ განპირობებული იყოს იმით, თუ როგორ იკრიბებიან ადამიანები სადილობისას და ალკოჰოლის მიღებასთან დაკავშირებული სხვა რიტუალების დროს. სოციოლოგმა ჟოან კორტინასმა France Télévisions-ს განუცხადა: „საზოგადოება უფრო მეტად მომსახურების სფეროზე ორიენტირებული (ტექნოკრატიული) გახდა. ხშირად ადამიანები შუადღისას ნორმალურად აღარც კი სადილობენ“.ბარკერის თქმით, OIV-ს ჯერ კიდევ არ აქვს მკაფიო პროგნოზი ირანის ომის შესაძლო გავლენის შესახებ ღვინის სექტორზე, თუმცა მოელიან გარკვეულ ეფექტს მომხმარებელთა განწყობასა და გადაზიდვებზე. მისივე თქმით, სექტორი ადაპტაციისთვის მეტ აქცენტს აკეთებს ღვინის ტურიზმსა და მდგრად განვითარებაზე, პარალელურად კი დაბალალკოჰოლურ პროდუქტებს ავითარებს.როგორც OIV ადრე იტყობინებოდა, 2025 წელს იტალია ღვინის მსოფლიოს უმსხვილესი მწარმოებელი იყო 47.3 მილიონი ჰექტოლიტრით, რითაც მან მცირედით გაუსწრო საფრანგეთს (35.9 მილიონი ჰექტოლიტრი) და ესპანეთს (29.4 მილიონი ჰექტოლიტრი).

1779355746

ვაზისა და ღვინის საერთაშორისო ორგანიზაციის (OIV) წინასწარი მონაცემებით, წარმოების კლება 2024 წლის წლის არაჩვეულებრივად უხვ მოსავალს უკავშირდება, ხოლო 2025–ში ხელსაყრელმა ამინდმა ქვეყანას საშუალება მისცა, წარმოება ბოლო წლების მაღალ ნიშნულთან ახლოს შეენარჩუნებინა.რეგიონული ტენდენციებიჩრდილოეთ ნახევარსფეროში (ევროკავშირის მიღმა) შედეგები არაერთგვაროვანია.რუსეთის ღვინის წარმოება 5.1 მლჰ-ის ფარგლებშია, რაც 2024 წლის დონეს ინარჩუნებს და ხუთწლიან საშუალოზე 9%-ით მაღალია. მოლდოვამ, 2024 წლის გვალვებისა და ყინვების შემდეგ, წარმოების 18%-იანი ზრდა (1.4 მლჰ) აჩვენა, რაც გაზაფხულის უხვმა ნალექებმა განაპირობა.ევროკავშირში წარმოება 140 მლჰ-ს შეადგენს, რაც 2024 წელთან შედარებით 2.1 მლჰ-ით (+2%) მეტია, თუმცა ხუთწლიან საშუალოზე 8%-ით ნაკლები. იტალიამ (47.4 მლჰ) დაიბრუნა მსოფლიოს უმსხვილესი მწარმოებლის სტატუსი, მაშინ როცა საფრანგეთი (35.9 მლჰ) და ესპანეთი (29.4 მლჰ) ისტორიულად მცირე მოსავალს აღრიცხავენ კლიმატური სტრესის, გვალვისა და დაავადებების გამო.გლობალური პერსპექტივაგლობალური ღვინის წარმოება 2025 წელს, წინასწარი შეფასებით, 232 მლჰ-ს აღწევს. ეს მაჩვენებელი 3%-ით აღემატება 2024 წლის ისტორიულად დაბალ მოცულობას, თუმცა მაინც 7%-ით ჩამორჩება ბოლო ხუთი წლის საშუალოს.აშშ: წარმოება 21.7 მლჰ-მდე გაიზარდა (+3%), თუმცა კვლავ ჩამორჩება ისტორიულ პიკს.სამხრეთ ნახევარსფერო: წარმოება 7%-ით გაიზარდა (49 მლჰ). ავსტრალია (11.6 მლჰ) და ახალი ზელანდია (3.7 მლჰ) ზრდას აჩვენებენ, ხოლო ჩილეში წარმოება 10%-ით შემცირდა წყლის დეფიციტის გამო.ბაზრის ბალანსიOIV-ის დასკვნით, ზედიზედ მესამე წელია, წარმოება საშუალოზე დაბალია, რაც ამცირებს ზეწოლას მარაგებზე გლობალური მოთხოვნის შემცირების ფონზე. კლიმატის ცვლილება კვლავ რჩება მთავარ ფაქტორად, რომელიც მსოფლიო მასშტაბით წარმოების დონეს განსაზღვრავს.

1779354881

გარემოს დაცვისა და სოფლის მეურნეობის მინისტრის მოადგილის, ზურაბ ეზუგბაიას განმარტებით, კანონში შემოდის ახალი ტერმინი - „ალკოჰოლიანი სასმელის ნიშანდება“. ეს გულისხმობს ღვინის ეროვნული სააგენტოს მიერ გაცემული QR კოდის დატანას სასმელის ეტიკეტზე, ჭურჭელზე ან შეფუთვაზე.ცვლილებები რამდენიმე მიმართულებას მოიცავს: წარმოების ქვოტები: იცვლება „მცირე ზომის მარნის“ განმარტება - წლიური წარმადობის ზედა ზღვარი 40 000 ლიტრიდან 25 000 ლიტრამდე მცირდება. ხარისხის კონტროლი: სავალდებულო ხდება ყველა კატეგორიის ღვინის ორგანოლეპტიკური (გემოვნური თვისებების) შემოწმება, იქნება ეს ადგილობრივი ბაზრისთვის განკუთვნილი თუ საექსპორტო პროდუქცია (აღნიშნული მოთხოვნა არ გავრცელდება მხოლოდ მცირე მარნებში წარმოებულ ბუნებრივ ღვინოებზე). ნიშანდების ვალდებულება: სარეალიზაციოდ განკუთვნილი ყველა სერტიფიცირებული ალკოჰოლიანი სასმელის ნიშანდებას ღვინის ეროვნული სააგენტო განახორციელებს. რეფორმის განხორციელებისთვის კონკრეტული ვადები უკვე გაწერილია. გარემოს დაცვისა და სოფლის მეურნეობის მინისტრმა 2026 წლის 1-ელ ნოემბრამდე უნდა დაამტკიცოს ნიშანდების წესი და ფორმა, ხოლო საქართველოს მთავრობამ 2027 წლის 1-ელ თებერვლამდე უნდა განსაზღვროს აღნიშნული მომსახურების საფასური.ინიციატივის ავტორების განცხადებით, ეს ნაბიჯი ხელს შეუწყობს ქართული ალკოჰოლური სასმელების ფალსიფიკაციისგან დაცვას და გააძლიერებს ნდობას ადგილობრივი ნაწარმის მიმართ როგორც შიდა, ისე საერთაშორისო ბაზრებზე.

1778677986

მთავრობის მეთაურმა ხაზი გაუსვა ბოლო ათწლეულის განმავლობაში საექსპორტო გეოგრაფიის გაორმაგებას და აღნიშნა, რომ ამჟამად ქართული პროდუქცია მსოფლიოს 70 ქვეყანაშია წარმოდგენილი.ძირითადი ეკონომიკური მაჩვენებლები: საექსპორტო მოცულობა: 2025 წელს საქართველომ 90 მილიონ ლიტრამდე ღვინის ექსპორტი განახორციელა. შემოსავლები: ექსპორტირებული პროდუქციის ღირებულებამ 268 მილიონ აშშ დოლარს მიაღწია. პრემიერის განცხადებით, ზრდის ეს დინამიკა 2026 წელსაც ნარჩუნდება. ინდუსტრიის გაფართოება: ქვეყანაში რეგისტრირებული მარნებისა და კომპანიების რაოდენობა თითქმის 30-ჯერ გაიზარდა და მათმა რიცხვმა 3 000-ს მიაღწია. კობახიძის თქმით, სახელმწიფო პოლიტიკის შედეგად განსაკუთრებული ზრდა მცირე და საოჯახო მარნების ნაწილში ფიქსირდება, რამაც რეგიონებში ახალი სამუშაო ადგილების შექმნას შეუწყო ხელი.„ჩვენი მიზანია, მსოფლიო ქართულ ღვინოს იცნობდეს, როგორც პრემიუმ კლასის პროდუქტს, რომელიც 8 000-წლიან ტრადიციას მუდმივი განვითარებით აგრძელებს“, - განაცხადა პრემიერ-მინისტრმა.მისივე შეფასებით, ბაზრების დივერსიფიკაცია და ხარისხის განუხრელი ზრდა რჩება იმ სტრატეგიის ნაწილად, რომელმაც ქართული ღვინის საერთაშორისო აღიარება და ეკონომიკური სიძლიერე უნდა უზრუნველყოს.

1778229896

„ვაზისა და ღვინის შესახებ კანონში“ შესული ცვლილებების თანახმად, 2026 წლის 1 მაისიდან, სამეწარმეო ვენახის გაშენება მხოლოდ ღვინის ეროვნული სააგენტოს წინასწარი თანხმობის საფუძველზე იქნება შესაძლებელი. რეფორმის ინიციატორები მიზნად ისახავენ ქართული ღვინის რეპუტაციის დაცვას გლობალურ ბაზარზე, სადაც კონკურენცია მზარდია.სონღულაშვილმა აღნიშნა, რომ ფალსიფიცირებული პროდუქციის მიმართ სახელმწიფო არანაირ კომპრომისს არ დაუშვებს.„ღვინის ფალსიფიკაციასთან ვიქნებით ძალიან მკაცრი, რადიკალური და შეურიგებელი. ზუსტად ამ მიმართულებით მუშაობს მთელი უწყება... არ გადის თვე, რომ არ ჩატარდეს საკონტროლო შესყიდვები როგორც რესტორნებში, ასევე ქსელურ მარკეტებში, და არაერთი შემთხვევა გვქონია ფალსიფიცირებული პროდუქციის ამოღების, მოხსნის და კონფისკაციის“, - განაცხადა მინისტრმა.მისივე თქმით, ხარისხის კონტროლი გადამწყვეტია, რადგან საქართველო, როგორც მცირემიწიანი ქვეყანა, საერთაშორისო ასპარეზზე რაოდენობით კონკურენციას ვერ გაწევს: „ჩვენი მთავარი მიზანი არის ხარისხი. „ქართული“ უნდა იყოს ხარისხის ნიშანი ყველა პროდუქტთან მიმართებით“.სექტორის გაჯანსაღების მიზნით, წელს სახელმწიფო კიდევ უფრო ამკაცრებს ყურძნის მიღების პირობებს შაქრიანობის მიხედვით. მინისტრის განცხადებით, დაბალი შაქრიანობის მქონე პროდუქტი ხარისხიანი ღვინის წარმოებაში ვეღარ მოხვდება.„კატეგორიულად ვამბობთ, რომ 17 გრადუსამდე ყურძენი ჩაბარდება 30 თეთრში, რადგან ეს არ შეიძლება გამოყენებულ იქნეს ხარისხიანი ღვინის წარმოებაში. სადაც სახელმწიფო არის პასუხისმგებელი, ხარისხი იქნება მკაცრად კონტროლირებული და მევენახე ანაზღაურებას მიიღებს თავისი შრომისა და პროდუქტის ხარისხის შესაბამისად“, - აღნიშნა სონღულაშვილმა.ღვინის ეროვნული სააგენტოს თავმჯდომარემ ლევან მეხუზლამ კი განმარტა, რომ ახალი კანონით ვენახების გაშენების ნებართვის მისაღებად მევენახეებმა ნიადაგის ლაბორატორიული ანალიზი უნდა წარადგინონ. ერთ-ერთი მთავარი კრიტერიუმი მიწისქვეშა წყლების დონეა - წყლის დგომა 1 მეტრზე ნაკლები არ უნდა იყოს.მეხუზლას თქმით, რეფორმა მიზნად ისახავს წარსულში დაშვებული შეცდომების გამოსწორებას, როდესაც ვენახები ჭალებში ან შეუსაბამო სიმაღლეებზე შენდებოდა მხოლოდ რაოდენობის გაზრდის მიზნით.„რეფორმა აზღვევს როგორც ინვესტორს, ისე მომხმარებელს, იმ ობიექტური პირობების გათვალისწინებით, როდესაც საერთაშორისო ბაზრებზე იკლო ღვინის მოხმარებამ და გაზრდილია კონკურენცია“, - დასძინა მეხუზლამ.სააგენტო უფლებამოსილი იქნება, არ გასცეს ვენახის გაშენების ნებართვა, თუ წარდგენილი დოკუმენტაცია ან ნიადაგის პირობები დადგენილ მაღალ სტანდარტებს არ შეესაბამება.

1777964760

ორივე ქვეყნის სტატისტიკურ მონაცემებზე დაყრდნობით, რეგიონში ტურისტული აქტივობა წინა წელთან შედარებით გარკვეულ კორექტირებას განიცდის.საქსტატის მონაცემებით, 1Q26-ში საქართველოში საერთაშორისო ვიზიტორების რაოდენობამ 994.8 ათასს მიაღწია, რაც 2.5%-ით აღემატება გასული წლის ანალოგიური პერიოდის მაჩვენებელს. განსაკუთრებით აღსანიშნავია ტურისტული ტიპის ვიზიტების 4%-იანი ზრდა, რამაც 997.5 ათასი შეადგინა.ამის საპირისპიროდ, აზერბაიჯანის სახელმწიფო სტატისტიკის მიხედვით, ქვეყანაში 484.4 ათასი უცხოელი ჩავიდა, რაც 4.7%-ით ნაკლებია 1Q25-თან შედარებით. ეს მაჩვენებელი თითქმის ორჯერ ჩამორჩება საქართველოს მიერ მიღებულ ვიზიტორთა რაოდენობას.მიუხედავად ვიზიტორთა რაოდენობის ზრდისა, საქართველოში ტურიზმიდან მიღებული შემოსავლები შემცირდა. ჯამურმა ხარჯებმა ₾2.2 მლრდ შეადგინა, რაც 5.2%-იანი კლებაა. საშუალო ხარჯი ერთ ვიზიტზე 5.1%-ით შემცირდა და 1 897.1 ლარი შეადგინა.ანალოგიური ტენდენციაა აზერბაიჯანშიც, სადაც უცხოელთა დანახარჯები 14.8%-ით შემცირდა და 511.7 მლნ მანათი შეადგინა. ხარჯების სტრუქტურაში ყველაზე დიდი კლება განთავსების მომსახურებაზე (-25.4%) დაფიქსირდა.ორივე ქვეყნისთვის რუსეთი კვლავ რჩება მთავარ საექსპორტო ბაზრად. საქართველოში რუსეთიდან 202.4 ათასი ვიზიტორი დაფიქსირდა (20.3%-იანი წილი).საქართველოს შემთხვევაში მნიშვნელოვანი მოთამაშეები არიან თურქეთი (18.5%) და სომხეთი (11.8%). აზერბაიჯანში კი თურქეთიდან ჩასული ტურისტების ხარჯებმა 6.4%-ით მოიმატა, მაშინ როცა ინდოეთიდან შესული ნაკადების დანახარჯები 3-ჯერ შემცირდა.საინტერესოა, რომ საქართველოში ვიზიტების 83.6% განმეორებითი ხასიათისაა, ხოლო ვიზიტორთა საშუალო ასაკი 31-50 წლამდე მერყეობს. აზერბაიჯანში კი ხარჯების ყველაზე დიდი წილი (234.6 მლნ მანათი) სატრანსპორტო მომსახურებაზე მოდის.

1777622062

აღნიშნული რაოდენობიდან საერთაშორისო ვიზიტორების მიერ განხორციელებული ვიზიტების რაოდენობამ 1.2 მილიონი შეადგინა, რაც 0.2%-ით ნაკლებია 2025 წლის ანალოგიური პერიოდის მაჩვენებელზე.1Q26-ში საერთაშორისო ვიზიტორების რაოდენობამ 994.8 ათასს მიაღწია, რაც 2.5%-ით მეტია წინა წლის ანალოგიური პერიოდის მაჩვენებელზე.საანგარიშო პერიოდში, საერთაშორისო ვიზიტორების მიერ განხორციელდა 997.5 ათასი ტურისტული ტიპის ვიზიტი, რაც 4%-ით მეტია წინა წლის ანალოგიური პერიოდის მაჩვენებელზე.საერთაშორისო ვიზიტორების 85.6% მხოლოდ ტურისტები იყვნენ. მხოლოდ ექსკურსანტების წილმა 11% შეადგინა, ხოლო ვიზიტორების 3.3% იყო როგორც ტურისტი, ასევე ექსკურსანტი.1Q26-ში ვიზიტორების ყველაზე დიდი რაოდენობა, 202.4 ათასი, დაფიქსირდა რუსეთის ფედერაციიდან, რაც ვიზიტორების ჯამური რაოდენობის 20.3%-ს შეადგენდა. მეორე ადგილზე იყო თურქეთი 18.5%-იანი წილით, ხოლო მესამეზე - სომხეთი 11.8%-იანი წილით.ვიზიტების ყველაზე დიდი რაოდენობა განხორციელდა თურქეთის (238.4 ათასი), რუსეთის ფედერაციისა (230.7 ათასი) და სომხეთის (160.5 ათასი) მოქალაქეების მიერ.ვიზიტორების უმრავლესობა (47.4%) მიეკუთვნებოდა 31-50 წლამდე ასაკობრივ კატეგორიას, ქალების რაოდენობა კი ვიზიტორების მთლიანი რაოდენობის 38.2%-ს შეადგენდა.1Q26-ში ვიზიტების ყველაზე დიდი ნაწილი (46.5%) განხორციელდა დასვენების, გართობისა და რეკრეაციის მიზნით.ვიზიტების უმრავლესობა განხორციელდა თბილისსა და აჭარის ა/რ-ში, შესაბამისად, 698.6 ათასი და 306 ათასი ვიზიტი.საქსტატის მონაცემებით, 1Q26-ში განხორციელებული ვიზიტებისას გათეული ღამეების საშუალო რაოდენობამ 5.87 ღამე შეადგინა, რაც 1Q25-ში დაფიქსირებულ მაჩვენებელზე (5.50 ღამე) 6.8%-ით მეტია. განხორციელებული ვიზიტების 83.6% წარმოადგენდა განმეორებითი ხასიათის ვიზიტს. 1Q26-ში განხორციელებული ვიზიტებისას გაწეული ხარჯები ₾2.2 მლრდ-ს გაუტოლდა, რაც 5.2%-ით ნაკლებია წინა წლის ანალოგიური პერიოდის მაჩვენებელზე. ვიზიტზე საშუალო ხარჯი 1Q25-თან შედარებით 5.1%-ით შემცირდა და 1 897.1 ლარი შეადგინა.

1777534972

მისი განმარტებით, რეფორმა მიმართულია იმისკენ, რომ ხარისხიანი პროდუქტი მხოლოდ ხარისხიანი ნედლეულისგან იწარმოებოდეს, რაც ვენახების გაშენების პროცესის რეგულირებას აუცილებელს ხდის.„ღვინის ხარისხის რეფორმა მიმართულია საქართველოს ღვინის ინდუსტრიის გაძლიერებაზე, რომელიც ხელს შეუწყობს ღვინის კომპანიებისა და მცირე მარნების განვითარებას. იმისათვის, რომ გვქონდეს ხარისხიანი ღვინო, ქვეყანას უნდა ჰქონდეს ხარისხიანი ვენახი, რაც იმას ნიშნავს, რომ ვენახების გაშენება უნდა ექვემდებარებოდეს რეგულაციებს“, - აღნიშნა ვაჭარაძემ.ვის შეეხება ახალი წესები?სააგენტო ხაზგასმით განმარტავს, რომ რეგულაცია მხოლოდ სამეწარმეო და კომერციულ საქმიანობაზე ვრცელდება და არ ზღუდავს ფიზიკურ პირებს. სამეწარმეო ვენახი: 1 მაისიდან კომერციული მიზნით ვენახის გაშენება ან აღდგენა-განახლება მხოლოდ სააგენტოს თანხმობით იქნება შესაძლებელი (რეგულაცია არ ეხება იმ პირებს, რომლებიც ვენახს საკუთარი მოხმარებისთვის აშენებენ). მომსახურების საფასური: ვენახის გაშენებაზე თანხმობა ღვინის ეროვნული სააგენტოს მიერ უფასოდ გაიცემა. ზურაბ ვაჭარაძის თქმით, რეგულაციების გამკაცრება მსოფლიო ბაზარზე არსებულმა მდგომარეობამაც განაპირობა. ვაზისა და ღვინის საერთაშორისო ორგანიზაციის (OIV) მონაცემებით, 1961 წლის შემდეგ ღვინის მოხმარება მსოფლიოში ყველაზე დაბალ ნიშნულზეა, რაც მწარმოებლებს შორის კონკურენციას ამწვავებს.„ჭარბწარმოების ფონზე, აქცენტი უნდა გაკეთდეს ნედლეულისა და საბოლოო პროდუქტის ხარისხზე. ვენახების გაშენებაზე თანხმობა ევროკავშირის ღვინის მწარმოებელ ყველა ქვეყანაში გაიცემა“, - დასძინა მან.სააგენტოს ინფორმაციით, ბოლო წლების სტატისტიკით, საქართველოში ყოველწლიურად დაახლოებით 500 ჰექტარი ახალი ვენახი შენდება. არსებული ტემპის გათვალისწინებით, ახალი რეგულაცია წელიწადში საშუალოდ 100-მდე პირს შეეხება.სამეწარმეო ვენახის გაშენების წესი მოიცავს ისეთ მნიშვნელოვან ეტაპებს, როგორიცაა ჯიშებისა და საძირეების შერჩევა, ნიადაგის მომზადება და აგროტექნიკური ღონისძიებები, რაც საბოლოო ჯამში ვენახის მაღალ პროდუქტიულობასა და ხარისხს უზრუნველყოფს.5 მარტს, „საერთაშორისო გამჭვირვალობა - საქართველო“-მ (TI) იმ დროს უკვე პარლამენტში წარდგენილი „ვაზისა და ღვინის შესახებ“ ახალ კანონპროექტი კორუფციული რისკების შემცველად და მცირე მეწარმეებისთვის დამაზიანებლად შეაფასა. ორგანიზაცია აცხადებდა, რომ დაგეგმილი ცვლილებები, რომლებიც ვენახის გაშენებაზე სავალდებულო ნებართვის შემოღებასა და საოჯახო მარნებისთვის ბიუროკრატიული ტვირთის გაზრდას ითვალისწინებს, ღვინის ეროვნულ სააგენტოს „გაუმჭვირვალე ძალაუფლებას“ ანიჭებს და ბაზარზე მცირე მოთამაშეების შევიწროების საფრთხეს ქმნის."კანონპროექტი მნიშვნელოვნად ზრდის ღვინის ეროვნული სააგენტოს ძალაუფლებას, რომელსაც უკვე არა მხოლოდ მაკონტროლებლის ფუნქცია ექნება, არამედ ბაზარზე დაშვების მარეგულირებელიც ხდება", - წერდა TI.

1777458291

ფეისბუკზე გამოქვეყნებულ ვრცელ პოსტში ბარნოვი მიიჩნევს, რომ ახალი რეგულაციები, რომლებიც ვენახის გაშენებას ბიუროკრატიულ ლაბირინთად აქცევს, შინაარსით ანტიეროვნულია. მისი თქმით, ეს პროცესი ქართული ღვინის მრავალფეროვნებას ისეთსავე საფრთხეს უქმნის, როგორც ისტორიული შემოსევები.„ეს არის ქართული ვაზის წინააღმდეგ განხორციელებული ისეთი ვანდალიზმი, ყოველგვარი სენტიმენტების გარეშე შაჰ აბასს რომ შეიძლება შევადაროთ. დარგი, რომელიც დინამიკურად ვითარდება და საქართველოს იმიჯის განუყოფელ ნაწილად იქცა, ერთი ხელის მოსმით უნდათ რომ მოკლან“, - აცხადებს ანდრო ბარნოვი.ბიუროკრატიული ბარიერები: „ნიადაგის ანალიზი ყველაზე დიდი ბომბია“ბარნოვის კრიტიკის მთავარი სამიზნე ის მოთხოვნებია, რომელთა დაკმაყოფილებაც მევენახეს ვენახის გაშენებამდე მოუწევს. იგი დეტალურად განმარტავს, თუ რატომ არის ეს პირობები დამღუპველი: „ადამიანი ვენახს ვეღარ გააშენებს, თუ არ წარადგინა ნიადაგის სრული ანალიზი და ლიცენზირებული სანერგედან ნერგის შეძენის ინვოისი. ეს სანერგეები დღეს ბრუნვაში არსებული ჯიშების 10%-საც არ აწარმოებენ. დაჯდება მერე ვიღაც ჩინოვნიკი და გადაწყვეტს, მოიღოს თუ არა მოწყალება. ნიადაგის ანალიზი ამ „უწყინარ“ ჩამონათვალში ყველაზე დიდი ბომბია. კრიტერიუმები არ ვიცით“.ბარნოვი Facebook-ზე გამოქვეყნებულ პოსტში ხაზს უსვამს იმ ფაქტს, რომ ეს რეგულაცია კლავს ექსპერიმენტებსა და ახალი ტერუარების აღმოჩენის შესაძლებლობას, რაც ქართული ღვინის მთავარი ხიბლია.„წარმოიდგინეთ, კარდენახში, ატენში, მუკუზანში, ხვანჭკარაში თუ ტვიშში რომ აქვს ადამიანს ვენახი, რა ნიადაგის ანალიზი უნდა იმას? პატრონს თავად თუ აინტერესებს, თორემ საქართველოს იმდენი ასეული ისტორიული ტერუარი აქვს, მარტო ტერუარის სახელი უდრის ათას ანალიზს. როგორ განვითარდება მრავალფეროვნება? - ვერ განვითარდება“, – წერს ანდრო ბარნოვი.მცირე მარნების გაქრობა და ეკონომიკური ზიანიბარნოვი პროგნოზირებს, რომ რეგისტრაციის ვალდებულება და მასთან დაკავშირებული ხარჯები (1000-2000 ლარი) გლეხების უმეტესობისთვის გადაულახავი იქნება, რაც ავტომატურად გაანადგურებს მცირე მარნებს, რომლებიც ყურძენს სწორედ ასეთი მევენახეებისგან ყიდულობდნენ.„რა მოუვათ მცირე მარნებს, რომლებიც შესანიშნავ მრავალფეროვნებას ქმნიდნენ ამ ქვეყანაში? — გაქრებიან. ამ მემარნეების შემოსავლების გაქრობა კი მთლიანად ეკონომიკას დააკლდება. გაღარიბდებიან ღვინის ბარები, ერთი მნიშვნელოვანი განზომილებით გაღარიბდება ტურისტული სექტორი. დასრულდება ექსპერიმენტები, დასრულდება ველური მევენახეობა და მეღვინეობა, ეს კი ზუსტად ის არის, რაც საქართველოს ნამდვილ ღვინის ქვეყნად აქცევს“, – წერს ბარნოვი.მისივე თქმით, ეს კანონი მევენახეებს აზარალებს, ხოლო ღვინის დიდ კომპანიებს „ქოც-მევენახეთა მონებად“ აქცევს, რადგან მათ მოუწევთ ყურძნის ჩაბარება მხოლოდ იმ მსხვილი ვენახებისგან, რომლებიც პრივილეგირებულ მდგომარეობაში აღმოჩნდებიან.რას ითვალისწინებს ახალი რეგულაცია?„ვაზისა და ღვინის შესახებ კანონში“ განხორციელებული ცვლილებების თანახმად, იცვლება სამეწარმეო ვენახების გაშენებასთან დაკავშირებული წესები. ყველა იმ პირმა, რომელმაც მიმდინარე წლის 1 მაისამდე გააშენა ვენახი და ამ დრომდე არ აქვს რეგისტრირებული ვენახების კადასტრის ერთიან ბაზაში, 2026 წლის 1 მაისამდე შესაბამის მუნიციპალიტეტში უნდა მიმართოს ღვინის ეროვნული სააგენტოს მევენახეობის კადასტრის სამმართველოს წარმომადგენლებს და ვენახი ოფიციალურად დაარეგისტრიროს.კანონში შესული ცვლილებების მიხედვით, 1 მაისის შემდგომ პერიოდში კომერციული მიზნებისთვის ვენახის გაშენება შესაძლებელი იქნება მხოლოდ ღვინის ეროვნული სააგენტოს წინასწარი თანხმობის საფუძველზე. წინააღმდეგ შემთხვევაში, პირი, რომელიც ვენახს თვითნებურად გააშენებს, ვერ შეძლებს მიღებული ყურძნის ან წარმოებული ღვინის კომერციულ რეალიზაციას.აღნიშნული რეგულაცია ვრცელდება მხოლოდ იმ პირებზე, რომლებიც ვენახის გაშენებას სამეწარმეო საქმიანობისთვის გეგმავენ და არ ეხება მათ, ვინც ვენახს პირადი მოხმარებისთვის აშენებს.ღვინის ეროვნული სააგენტოს მიერ ვენახის გაშენებაზე თანხმობა უფასოდ გაიცემა.5 მარტს, „საერთაშორისო გამჭვირვალობა - საქართველო“-მ (TI) იმ დროს უკვე პარლამენტში წარდგენილი „ვაზისა და ღვინის შესახებ“ ახალ კანონპროექტი კორუფციული რისკების შემცველად და მცირე მეწარმეებისთვის დამაზიანებლად შეაფასა. ორგანიზაცია აცხადებდა, რომ დაგეგმილი ცვლილებები, რომლებიც ვენახის გაშენებაზე სავალდებულო ნებართვის შემოღებასა და საოჯახო მარნებისთვის ბიუროკრატიული ტვირთის გაზრდას ითვალისწინებს, ღვინის ეროვნულ სააგენტოს „გაუმჭვირვალე ძალაუფლებას“ ანიჭებს და ბაზარზე მცირე მოთამაშეების შევიწროების საფრთხეს ქმნის."კანონპროექტი მნიშვნელოვნად ზრდის ღვინის ეროვნული სააგენტოს ძალაუფლებას, რომელსაც უკვე არა მხოლოდ მაკონტროლებლის ფუნქცია ექნება, არამედ ბაზარზე დაშვების მარეგულირებელიც ხდება", - წერდა TI.

1777452492