ბერლინში სიტყვით გამოსვლისას, მერცმა აღნიშნა, რომ უკრაინის ბრძოლა რუსეთის თავდასხმების წინააღმდეგ იმაზე ეფექტურია, ვიდრე ამას ხშირად წარმოაჩენენ. პარალელურად, ვოლოდიმირ ზელენსკიმ განაცხადა, რომ უკრაინის მიერ დაკარგული ტერიტორიების დაბრუნება „მხოლოდ დროის საკითხია“.უკრაინის სამხედრო უწყების ხელმძღვანელმა დღეს გამოაცხადა, რომ უკრაინამ დაიბრუნა კონტროლი 400 კვადრატულ კილომეტრ ტერიტორიაზე, მათ შორის რვა დასახლებულ პუნქტზე ალექსანდრიუკას ღერძზე, რადგან სამხრეთის კონტრშეტევა შენელების ნიშნებს არ ავლენს.სრულმასშტაბიანი შეჭრის მეოთხე წლისთავის წინა დღეს, მერცმა მგზნებარე სიტყვაში დაგმო ვლადიმირ პუტინის მმართველობის ქვეშ მყოფი რუსეთის „ბარბაროსობა“.„ეს ქვეყანა, ამ ხელმძღვანელობის პირობებში, ამჟამად სრული ბარბაროსობის ფსკერზე იმყოფება და არავის უნდა ეპარებოდეს ეჭვი იმაში, თუ რა სახის რეჟიმთან და ბარბაროსობასთან გვაქვს საქმე დღეს რუსეთის მხრიდან“, - განაცხადა მან.

1771850121

ზელენსკიმ BBC-ის განუცხადა, რომ პუტინს მესამე მსოფლიო ომი უკვე დაწყებული აქვს და ერთადერთი პასუხი ინტენსიური სამხედრო და ეკონომიკური ზეწოლაა, რათა მან უკან დაიხიოს.„მჯერა, რომ პუტინმა ის უკვე დაიწყო. საკითხავი მხოლოდ ისაა, კიდევ რამდენი ტერიტორიის მითვისებას შეძლებს და როგორ შევაჩეროთ იგი... რუსეთს სურს მსოფლიოს თავს მოახვიოს ცხოვრების განსხვავებული წესი და შეცვალოს ის ყოფა, რომელიც ხალხმა თავად აირჩია“.რუსეთის მოთხოვნას, რაც შეეხება, რომ უკრაინამ ჩააბაროს დონეცკის აღმოსავლეთ რეგიონის ის 20%, რომელსაც ჯერ კიდევ აკონტროლებს - ქალაქების ხაზი, რომელთაც უკრაინა „ციხესიმაგრე-ქალაქებს“ უწოდებს - ისევე როგორც დამატებითი მიწები ხერსონისა და ზაპორიჟიას სამხრეთ რეგიონებში? - BBC-ის ჟურნალისტმა ზელენსკის ჰკითხა, არის თუ არა ეს გონივრული მოთხოვნა, თუკი ის ცეცხლის შეწყვეტამდე მიგვიყვანს?„მე ამას სხვანაირად ვხედავ. ამას მხოლოდ მიწად არ აღვიქვამ. ამაში ვხედავ მიტოვებას - ჩვენი პოზიციების დასუსტებას, იქ მცხოვრები ასიათასობით ჩვენი ადამიანის ბედის ამარა დატოვებას. აი, ასე ვხედავ ამას. და დარწმუნებული ვარ, რომ ეს „უკან დახევა“ ჩვენს საზოგადოებას გახლეჩს“.BBC-ის ჟურნალისტი მორიგ კითხვაზე: მაგრამ განა ეს არ არის გადასახდელად მისაღები ფასი, თუკი ის პუტინს დააკმაყოფილებს? გგონიათ, რომ ეს მას დააკმაყოფილებს? - ზელენსკი პასუხობს, „ეს მას, ალბათ, გარკვეული ხნით დააკმაყოფილებს... მას პაუზა სჭირდება... მაგრამ როგორც კი ძალებს აღიდგენს - ჩვენი ევროპელი პარტნიორები ამბობენ, რომ ამას სამიდან ხუთ წლამდე დასჭირდება, ჩემი აზრით კი, ძალების აღდგენას ორ წელზე მეტს არ მოანდომებს - მერე საით წავა? ჩვენ არ ვიცით, მაგრამ ის, რომ მას ომის გაგრძელება მოუნდება, ფაქტია“. ტრამპის ფაქტორი და გამარჯვების ხედვააშშ-ის პრეზიდენტმა დონალდ ტრამპმა ჟენევაში ცეცხლის შეწყვეტის ბოლო მოლაპარაკებების წინა დღეს განაცხადა, რომ „უკრაინას ურჩევნია მოლაპარაკებების მაგიდასთან სწრაფად დაჯდეს“. ის კვლავ უფრო მეტად უკრაინაზე აჭერს ხელს, ვიდრე რუსეთზე. დასავლელი დიპლომატები გასული ზაფხულიდან მოყოლებული მიანიშნებენ, რომ ტრამპი ეთანხმება პუტინს იმაში, რომ უკრაინის მხრიდან ტერიტორიული დათმობები არის ცეცხლის შეწყვეტის გასაღები, რომელიც ტრამპს იდეალურ შემთხვევაში მომავალ ზაფხულამდე სურს.BBC წერს, თეთრი სახლის გარეთაც ბევრი ანალიტიკოსი მიიჩნევს, რომ უკრაინა ომს ვერ მოიგებს და მოსკოვისთვის დათმობების გარეშე მას წააგებს. ზელენსკის BBC-ის ჟურნალისტმა ჰკითხე, ჰქონდათ თუ არა ტრამპსა და სხვებს სიმართლის მარცვალი?„ახლა სად ხართ?“ - უპასუხა კითხვითვე ზელენსკიმ. „დღეს თქვენ ხართ კიევში, ჩვენი სამშობლოს დედაქალაქში, თქვენ ხართ უკრაინაში. ამისთვის ძალიან მადლობელი ვარ. წავაგებთ? რა თქმა უნდა, არა, რადგან ჩვენ უკრაინის დამოუკიდებლობისთვის ვიბრძვით“.ზელენსკის ხშირად უთქვამს, რომ უკრაინას შეუძლია მოგება, მაგრამ როგორი იქნება გამარჯვება? რა თქმა უნდა, მისი თქმით, გამარჯვება უკრაინელებისთვის ნორმალური ცხოვრების აღდგენასა და მკვლელობების დასრულებას ნიშნავს. თუმცა, გამარჯვების უფრო ფართო ხედვა, რომელიც მან წარმოადგინა, გლობალურ საფრთხეს ეხებოდა, რომელიც, მისი თქმით, პუტინისგან მოდის.„მჯერა, რომ პუტინის დღეს შეჩერება და მისი მხრიდან უკრაინის ოკუპაციის აღკვეთა მთელი მსოფლიოს გამარჯვებაა. რადგან პუტინი უკრაინაზე არ გაჩერდება“.BBC-ის ჟურნალისტი: თქვენ ხომ არ ამბობთ, რომ გამარჯვება მთელი ტერიტორიის დაბრუნებაა?ზელენსკი: „ჩვენ ამას გავაკეთებთ. ეს აბსოლუტურად ნათელია. ეს მხოლოდ დროის საკითხია. ამის დღეს გაკეთება ნიშნავს უამრავი ადამიანის - მილიონობით ადამიანის დაკარგვას, რადგან [რუსული] არმია დიდია და ჩვენ გვესმის ასეთი ნაბიჯების ფასი. თქვენ არ გეყოფათ ხალხი, მათ დაკარგავთ და რა არის მიწა ხალხის გარეშე? სიმართლე გითხრათ, არაფერი. ასევე არ გვაქვს საკმარისი იარაღი. ეს მხოლოდ ჩვენზე არ არის დამოკიდებული, არამედ ჩვენს პარტნიორებზეც. ასე რომ, ამ მომენტისთვის ეს შეუძლებელია, მაგრამ 1991 წლის სამართლიან საზღვრებთან დაბრუნება უდავოდ არის არა მხოლოდ გამარჯვება, არამედ სამართლიანობა. უკრაინის გამარჯვება ჩვენი დამოუკიდებლობის შენარჩუნებაა, ხოლო მთელი მსოფლიოსთვის სამართლიანობის გამარჯვება - ჩვენი ყველა მიწის დაბრუნება“. ურთიერთობა ვაშინგტონთანერთი წლის წინ ზელენსკი თეთრ სახლს ეწვია და მიიღო ისეთი დახვედრა, რომელიც ერთ-ერთმა მაღალი რანგის დასავლელმა დიპლომატმა BBC-ის აღუწერა, როგორც წინასწარ დაგეგმილი საჯარო „დიპლომატიური ძარცვა“ დონალდ ტრამპისა და მისი ვიცე-პრეზიდენტის, ჯეი დი ვენსის მხრიდან. მათ არგუმენტებს, მსოფლიო მედიის თანდასწრებით, მილიონობით ადამიანი ადევნებდა თვალს.ტრამპი, რომელიც ახლახან მეორე ვადით იქნა არჩეული, უგზავნიდა სიგნალს მსოფლიოს, რომ მხარდაჭერის ერა, რომლის იმედიც ზელენსკის და უკრაინას პრეზიდენტ ჯო ბაიდენისგან ჰქონდათ, დასრულდა. NATO-ს წევრები უკვე გაფრთხილებულნი იყვნენ ახალი ადმინისტრაციის მიერ. ვენსი კი ახალი დაბრუნებული იყო ევროპიდან, სადაც დასავლეთ ევროპას ტრანსატლანტიკური ალიანსის სიმტკიცეზე ილუზიები დაუმსხვრია.მას შემდეგ, ზელენსკი, რომელიც გავრცელებული ინფორმაციით ბრიტანეთის ეროვნული უსაფრთხოების მრჩევლის, ჯონათან პაუელისგან იღებდა რჩევებს, ტრამპთან საჯარო დაპირისპირებას ერიდება. აშშ-ის პრეზიდენტმა თითქმის მთლიანად შეაჩერა უკრაინისთვის სამხედრო დახმარების მიწოდება. თუმცა, აშშ კვლავ აწვდის სასიცოცხლოდ მნიშვნელოვან სადაზვერვო ინფორმაციას, ხოლო ევროპული ქვეყნები მილიარდებს ხარჯავენ ამერიკელებისგან იარაღის შესაძენად უკრაინისთვის გადასაცემად.უკრაინის პრეზიდენტს BBC-ის ჟურნალისტმა ჰკითხა ტრამპის ხშირად წინააღმდეგობრივ განცხადებებზე და შეახსენა მის მიერ ნათქვამი სიცრუე, თითქოს ზელენსკი დიქტატორია, რომელმაც ომი დაიწყო - რაც ზუსტად იმეორებს ვლადიმერ პუტინის მტკიცებებს. ზელენსკის გაეცინა:„მე არ ვარ დიქტატორი და ომი არ დამიწყია, ესაა და ეს“.მაგრამ შეგიძლიათ ენდოთ ტრამპს? ჰკითხა ჟურნალისტმა მას, თუკი მისგან უსაფრთხოების გარანტიას მიიღებდა, შეასრულებდა თუ არა ის სიტყვას? ის ხომ ადამიანია, რომელიც აზრს ხშირად იცვლის.„საუბარია არა მხოლოდ პრეზიდენტ ტრამპზე, არამედ ამერიკაზე. ჩვენ ყველანი პრეზიდენტები ვართ შესაბამისი ვადებით. ჩვენ გვინდა გარანტიები, მაგალითად, 30 წლით. პოლიტიკური ელიტები შეიცვლება, ლიდერები შეიცვლება“.იგი გულისხმობდა, რომ აშშ-ის უსაფრთხოების გარანტიებს ვაშინგტონში კონგრესის თანხმობა სჭირდება, რათა ისინი მყარი იყოს. „მათ კონგრესში მიზეზთა გამო ეყრება კენჭი. ეს მხოლოდ პრეზიდენტებს არ ეხება. კონგრესია საჭირო. რადგან პრეზიდენტები იცვლებიან, ინსტიტუტები კი რჩება.“ სხვა სიტყვებით რომ ვთქვათ, დონალდ ტრამპი შეიძლება არასაიმედო იყოს, მაგრამ ის იქ სამუდამოდ არ იქნება.არჩევნები და შიდა გამოწვევებიზელენსკი ამბობს, რომ უსაფრთხოების ეს გარანტიები ძალაში უნდა შევიდეს მანამ, სანამ ის აშშ-ის კიდევ ერთ მოთხოვნას განიხილავს - ზაფხულისთვის საყოველთაო არჩევნების ჩატარებას. ეს მოთხოვნა ეხმიანება რუსულ ნარატივს, თითქოს ზელენსკი არალეგიტიმური პრეზიდენტია. ტრამპს არ მოუთხოვია არჩევნები რუსეთში, სადაც პუტინი პირველად მე-20 საუკუნის ბოლო დღეს გახდა ლიდერი.ზელენსკიმ აღნიშნა, რომ ჯერ არ გადაუწყვეტია, იყრის თუ არა კვლავ კენჭს, როდესაც არჩევნები ჩატარდება: „შეიძლება კენჭი ვიყარო, შეიძლება - არა“.არჩევნები 2024 წელს უნდა ჩატარებულიყო, თუმცა მათი ჩატარება შეუძლებელი იყო საომარი მდგომარეობის გამო, რომელიც რუსეთის სრულმასშტაბიანი შეჭრის შემდეგ შემოიღეს. გადადებული არჩევნების ჩატარება, მისი თქმით, ტექნიკურად შესაძლებელია, თუკი ექნებათ დრო კანონის შესაცვლელად, მაგრამ მას მანამდე უსაფრთხოების გარანტიები სჭირდება.ზელენსკიმ ჩამოთვალა იმდენი პოტენციური პრობლემა არჩევნების ჩატარებასთან დაკავშირებით (მილიონობით ლტოლვილი საზღვარგარეთ და რუსეთის მიერ ოკუპირებული ტერიტორიები), რომ BBC-ის ჟურნალისტმა ვარაუდი გამოთქვა, რომ რეალურად ის ამ იდეის წინააღმდეგი იყო.„თუ ეს ომის დასრულების პირობაა, მოდით გავაკეთოთ. მე ვთქვი: 'სიმართლე გითხრათ, თქვენ მუდმივად აყენებთ არჩევნების საკითხს". პარტნიორებს ვუთხარი: "თქვენ ერთი რამ უნდა გადაწყვიტოთ: ჩემი თავიდან მოცილება გინდათ თუ არჩევნების ჩატარება? თუ არჩევნების ჩატარება გინდათ, მაშინ ჩაატარეთ ეს არჩევნები პატიოსნად. ჩაატარეთ ისე, რომ უკრაინელმა ხალხმა ცნოს ისინი, უპირველეს ყოვლისა. და თქვენ თავადაც უნდა აღიაროთ, რომ ეს ლეგიტიმური არჩევნებია“.იარაღი და მომავალივოლოდიმირ ზელენსკის უკრაინაშიც ჰყავს ოპონენტები და მკაცრი კრიტიკოსები. მის მთავრობას გასულ შემოდგომაზე კორუფციულმა სკანდალმა დაარტყა, რასაც მისი უახლოესი მრჩევლის წასვლა მოჰყვა. თუმცა, ახალი გუნდით, ზელენსკი კვლავ სარგებლობს მხარდაჭერის ისეთი რეიტინგით, რომელზეც დასავლეთ ევროპის ლიდერების უმეტესობას მხოლოდ ოცნება შეუძლია.იგი ზოგჯერ აღიზიანებს მოკავშირეებს მეტი და უკეთესი აღჭურვილობის მუდმივი მოთხოვნით. ერთ-ერთი ბრალდება, რომელიც მას ოვალურ კაბინეტში ტრამპმა და ვენსმა წაუყენეს, იყო ის, რომ იგი არ იყო საკმარისად მადლიერი. მისი სიის ბოლო პუნქტია ნებართვა ამერიკული იარაღის ლიცენზიით წარმოებაზე, მათ შორის Patriot-ის საჰაერო თავდაცვის რაკეტების.„დღეს საკითხი საჰაერო თავდაცვაა. ეს ყველაზე რთული პრობლემაა. სამწუხაროდ, ჩვენი პარტნიორები ჯერ კიდევ არ გვაძლევენ ლიცენზიებს სისტემების თვითონ საწარმოებლად, მაგალითად, Patriot-ის სისტემების, ან თუნდაც რაკეტების იმ სისტემებისთვის, რომლებიც უკვე გვაქვს. ჯერჯერობით ამაში წარმატებას ვერ მივაღწიეთ“.ჟურნალისტი: რატომ არ აკეთებენ ამას?ზელენსკი: „არ ვიცი. პასუხი არ მაქვს“.BBC-თან ინტერვიუს დასასრულს ზელენსკიმ უკრაინულიდან ინგლისურზე გადაინაცვლა. BBC-ის ჟურნალისტმა კი მას ჰკითხა, უნდა მოვემზადოთ თუ არა კიდევ უფრო ხანგრძლივი ომისთვის უკრაინაში?„არა, არა, არა, ეს ორი პარალელური გზაა... თქვენ ჭადრაკს ეთამაშებით ბევრ ლიდერს და არა რუსეთს. არ არსებობს ერთი სწორი გზა. უნდა აირჩიოთ ბევრი პარალელური ნაბიჯი, პარალელური მიმართულება. და ერთ-ერთ ამ პარალელურ გზას, ვფიქრობ, მოჰყვება წარმატება. ჩვენთვის წარმატება პუტინის შეჩერებაა“.ჟურნალისტი: მაგრამ ვლადიმერ პუტინი ხომ არ აპირებს ამ ომის დასრულებას? თუ მასზე კოლოსალური ზეწოლა არ იქნება, ის კი არ ჩანს ასეთ ზეწოლის ქვეშ.ზელენსკი: „კი და არა. ვნახოთ. კი და არა. მას არ უნდა, მაგრამ "არ უნდა" არ ნიშნავს, რომ არ გააკეთებს. ღმერთმა ინებოს. ღმერთმა ქნას, წარმატებულები ვიყოთ. გმადლობთ“.ზელენსკიმ ეს თქვა თუ არა, ფოტოები გადაიღო, BBC-ის გუნდს ხელი ჩამოართვა და ოთახიდან გავიდა.

1771824540

ჟურნალისტმა გერმანელ კოლეგასთან, პაულ რონცჰაიმერთან პოდკასტში აღნიშნა, გასულ კვირას ზელენსკიმ პირად კაბინეტში შეხვედრა გამართა არა მინისტრებთან, არამედ უახლოეს მრჩევლებთან. იქ მან განაცხადა, რომ კონფლიქტის მოგვარების შესახებ მოლაპარაკებები ფაქტობრივად ჩავარდა და ახლა ქვეყანა ხანგრძლივი ომისთვის უნდა მოემზადოს.შეხვედრა გაიმართა პრეზიდენტის მიუნხენში გამგზავრების წინ, სადაც მან და მისმა გუნდმა უსაფრთხოების კონფერენციაში მიიღეს მონაწილეობა. კონფერენციაზე განიხილებოდა როგორც უკრაინის საერთაშორისო მხარდაჭერა, ისე სტრატეგიული ნაბიჯები რუსეთის აგრესიის საპასუხოდ.„რაც ჩემში ყველაზე დიდ სკეპტიციზმს იწვევს სწრაფი მშვიდობის შესახებ განცხადებების მიმართ, არის ზელენსკის პირად კაბინეტში გამართული შეხვედრა. იქ მან თქვა, რომ მოლაპარაკებები ჩაიშალა და ახლა მათ ომის კიდევ სამწლიანი გეგმა უნდა შეიმუშაონ“, - ამბობს ჟურნალისტი.პანჩევსკიმ ხაზგასმით აღნიშნა, რომ ზელენსკიმ ეს „პირდაპირ“ თქვა. პრეზიდენტის მრჩევლები ამ განცხადებებით შოკირებულნი დარჩნენ.„ყველა სრულ შოკში იყო. რა თქმა უნდა, არავის სურს სამწლიანი ომი. მანამდე ისინი (პრეზიდენტის ოფისის თანამშრომლები და სამუშაო ჯგუფი) ფაქტობრივად მუშაობდნენ გაზაფხულის ბოლოს ან ზაფხულის დასაწყისში არჩევნებისა და რეფერენდუმის ჩატარების გეგმაზე, როდესაც შეთანხმება, როგორიც არ უნდა ყოფილიყო ის, წარედგინებოდა ამომრჩეველს და შემდეგ ნახავდნენ, მიიღებდნენ თუ არა ისინი შეთანხმებულ პირობებს“, - დასძინა მან.ჟურნალისტმა აღნიშნა, რომ ზელენსკიმ მოულოდნელად „შიდა 180-გრადუსიანი შემობრუნება“ გააკეთა.„ეს ჩემში გარკვეულ სკეპტიციზმს იწვევს, რადგან მიუთითებს, რომ მას აღარ შეუძლია მოლაპარაკებების წარმოება. რაიმე მიზეზით - უბრალოდ არ ვიცი, რა არის ეს მიზეზი. ეს ჩემი წყაროა. მე ვიცნობ მის სამ უახლოეს მრჩეველს, რომლებმაც თავად არ იცოდნენ, ან თუ იცოდნენ, არ მითხრეს, რატომ შეიცვალა მან აზრი. ერთ-ერთი ვარაუდით, ტრამპმა უთხრა: "ბიჭო, ეს ჩემი ბოლო შეთავაზებაა. ამაზე უკეთესი აღარ იქნება. რაც დაგპირდი, არის ის, რისი შემოთავაზებაც შეგვიძლია". და ეს ზელენსკისთვის საკმარისი არ აღმოჩნდა“, - დაამატა პანჩევსკიმ.ამავდროულად, პრეზიდენტის ოფისში ჟურნალისტებს განუცხადეს, რომ პანჩევსკის განცხადებები „სისულელეა“.„არ ყოფილა არც ასეთი საუბარი მრჩევლებთან, არც ნეგატივი მოლაპარაკებების შესახებ და არც დავალება "კიდევ სამწლიან ომზე". ეს უბრალოდ სულელური ფეიკია“, - აღნიშნა პრეზიდენტის მრჩეველმა კომუნიკაციების საკითხებში, დმიტრო ლიტვინმა.სამშვიდობო მოლაპარაკებების მსვლელობის კომენტირებისას, ლიტვინმა გამოთქვა რწმენა, რომ დელეგაციები თებერვალშივე შეხვდებიან ერთმანეთს, თუმცა ეს მხოლოდ უკრაინაზე არ არის დამოკიდებული. დღეს პრეზიდენტს მოლაპარაკებების ჯგუფთან ექნება თათბირი.Axios წერს, რომ უკრაინის პრეზიდენტმა ვოლოდიმირ ზელენსკიმ თავის გუნდს კრემლის ხელმძღვანელ პუტინთან შეხვედრის ორგანიზება დაავალა. სახელმწიფოს მეთაურს მიაჩნია, რომ ეს საუკეთესო გზაა ტერიტორიების საკითხში პროგრესის მისაღწევად.თავად ზელენსკიმ განაცხადა, რომ ჟენევაში უკრაინის, აშშ-სა და რუსეთის მოლაპარაკებების დროს ორი ჯგუფი მუშაობდა - სამხედრო და პოლიტიკური. ტერიტორიების საკითხზე სამ მხარეს სამი განსხვავებული თვალსაზრისი ჰქონდა.24 თებერვალს 4 წელი სრულდება, რუსეთის მიერ უკრაინის წინააღმდეგ სრულმასშტაბიანი ომის დაწყებიდან.

1771591943

„იმ დოკუმენტებში, რომლებზეც ახლა ვმუშაობთ, წინ გადადგმულ მნიშვნელოვან ნაბიჯებს ვხედავ. მიმდინარეობს ძალიან კარგი მუშაობა კიევისთვის უსაფრთხოების გარანტიების შესახებ, რაც, სხვათა შორის, ეფუძნება იტალიურ წინადადებას - მათი შემუშავება ჩრდილოატლანტიკური ხელშეკრულების (NATO) მე-5 მუხლის მოდელით მოხდეს“, - განაცხადა ჯორჯია მელონმა Sky tg24-თან ინტერვიუში.მისივე თქმით, ასევე გრძელდება მუშაობა უკრაინის აღდგენის საკითხზე. მელონმა განმარტა, რომ „არსებობს სამშვიდობო გეგმა, რომელშიც ბევრი საკითხი ფურცელზე უკვე გადაწყვეტილია“.„თუმცა, ჩვენ ჯერ კიდევ ძალიან შორს ვართ მთავარი - ტერიტორიული საკითხის გადაწყვეტისგან, სადაც რუსეთი აგრძელებს პრეტენზიების წამოყენებას, რაც, ჩემი აზრით, აბსოლუტურად დაუსაბუთებელია. ვფიქრობ, როგორც უკვე არაერთხელ მითქვამს, მნიშვნელოვანია არა უბრალოდ მშვიდობის მიღწევა, არამედ სამართლიანი მშვიდობის მიღწევა“, - თქვა ჯორჯია მელონმა.უკრაინის პრეზიდენტმა ვოლოდიმირ ზელენსკიმ ბრიტანელ ჟურნალისტ პირს მორგანთან ინტერვიუში განაცხადა, რომ 17-18 თებერვალს ჟენევაში გამართულ მოლაპარაკებებზე სამხედრო ჯგუფში გარკვეული პროგრესი იყო. ამავდროულად, პოლიტიკური მიმართულებით ყველაფერი უფრო რთულადაა - სამ მხარეს ტერიტორიების საკითხზე სამი განსხვავებული თვალსაზრისი აქვს.გერმანიის კანცლერი ფრიდრიხ მერცი მიიჩნევს, რომ მოლაპარაკებების გზით ომის სწრაფად დასრულების შანსი მცირეა. მისი აზრით, რუსეთ-უკრაინის ომი „მხოლოდ მაშინ დასრულდება, როდესაც ერთ-ერთი მხარე თავის სამხედრო ან ეკონომიკურ რესურსებს ამოწურავს“.

1771565880

„მინდა ხაზი გავუსვა, რომ შემდეგი შეხვედრაც ასევე შვეიცარიაში იქნება. ეს არის ინფორმაცია, რომელსაც დღეისათვის ვფლობ. რა თქმა უნდა, ჩვენი ჯგუფი დაბრუნდება და უფრო დეტალური ინფორმაცია მექნება, ვიდრე ახლა ტელეფონში“, - განაცხადა ზელენსკიმ.ზელენსკიმ აღნიშნა, თუ რამდენად მნიშვნელოვანია, რომ მოლაპარაკებების პროცესი სწორედ ევროპაში მიმდინარეობდა.„ვფიქრობ, კარგი მომენტია ის, რომ შეხვედრა შვეიცარიაში გაიმართა. ეს ძალიან მნიშვნელოვანია. მე ამას ყოველთვის ვამბობ ახლო აღმოსავლეთისა და სხვა ქვეყნების მიმართ პატივისცემით, თუმცა მიმაჩნია, რომ თუ ომი ევროპაშია, ადგილიც აქ უნდა ვეძებოთ“, - თქვა ზელენსკიმ.18 თებერვალს დილით, უკრაინის დელეგაციის ხელმძღვანელმა, ეროვნული უსაფრთხოებისა და თავდაცვის საბჭოს მდივანმა რუსტემ უმეროვმა განაცხადა, რომ ჟენევაში უკრაინა-ამერიკა-რუსეთის მოლაპარაკებების მეორე დღე დაიწყო, რომელიც უკრაინის წინააღმდეგ რუსეთის ომის მოგვარებას ეხება.მოგვიანებით, რუსეთის დელეგაციის ხელმძღვანელმა ვლადიმერ მედინსკიმ განაცხადა, რომ სამმხრივი მოლაპარაკებების მორიგი რაუნდი, რომელიც 18 თებერვალს მიმდინარეობდა, დასრულდა. მისი თქმით, მოლაპარაკებები ჟენევაში დაახლოებით ორ საათს გაგრძელდა, იყო „მძიმე, თუმცა საქმიანი“.ზელენსკიმ აღნიშნა, რომ მოლაპარაკებებზე მიღწეულია შეთანხმება იმის შესახებ, რომ ცეცხლის შეწყვეტის რეჟიმის დაცვის მონიტორინგი ამერიკის შეერთებული შტატების მონაწილეობით განხორციელდება.შემდეგ მან დაამატა, რომ ომის დასრულების შესახებ მოლაპარაკებებზე არასაკმარისად არის დამუშავებული პოლიტიკური საკითხები შესაძლო კომპრომისებისა და ლიდერების აუცილებელი შეხვედრის თაობაზე.

1771479960

„რაც შეეხება მოლაპარაკებების შინაარსობრივ მხარეს. უპირველეს ყოვლისა, იცით, რომ ორი მიმართულებაა: სამხედრო და პოლიტიკური. აქ მინდა ვთქვა, რომ სამხედრო მიმართულებით სამივე მხარე კონსტრუქციული იყო“, - განაცხადა ზელენსკიმ.უკრაინის პრეზიდენტის თქმით, კერძოდ, „სამხედროებს ესმით, როგორ განახორციელონ ცეცხლის შეწყვეტისა და ომის დასრულების მონიტორინგი, თუკი იქნება პოლიტიკური ნება“.„ისინი (მოლაპარაკების მხარეები - რედ.), პრინციპში, იქ თითქმის ყველაფერზე შეთანხმდნენ. მონიტორინგი ნამდვილად ამერიკული მხარის მონაწილეობით იქნება. მიმაჩნია, რომ ეს კონსტრუქციული სიგნალია“, - განაცხადა ზელენსკიმ.პრეზიდენტმა აღნიშნა, რომ მონიტორინგის შესახებ ყველა სხვა ტექნიკურ დეტალს უკრაინის შეიარაღებული ძალების გენერალური შტაბის უფროსი, ანდრიი გნატოვი მოახსენებს, როდესაც ჟენევიდან დაბრუნდება.18 თებერვალს დილით, უკრაინის დელეგაციის ხელმძღვანელმა, ეროვნული უსაფრთხოებისა და თავდაცვის საბჭოს მდივანმა რუსტემ უმეროვმა განაცხადა, რომ ჟენევაში უკრაინა-ამერიკა-რუსეთის მოლაპარაკებების მეორე დღე დაიწყო.მოგვიანებით, რუსეთის დელეგაციის ხელმძღვანელმა ვლადიმერ მედინსკიმ განაცხადა, რომ სამმხრივი მოლაპარაკებების მორიგი რაუნდი, რომელიც 18 თებერვალს მიმდინარეობდა, დასრულდა. მისი თქმით, მოლაპარაკებები ჟენევაში დაახლოებით ორ საათს გაგრძელდა, იყო „მძიმე, თუმცა საქმიანი“.24 თებერვალს 4 წელი სრულდება, რუსეთის მიერ უკრაინის წინააღმდეგ სრულმასშტაბიანი ომის დაწყებიდან.

1771414275

მაშინ, როდესაც ზელენსკი Axios-ს ესაუბრებოდა, უკრაინელი და რუსი მომლაპარაკებლები ჟენევაში პირდაპირი მოლაპარაკებების მესამე რაუნდს მართავდნენ.მთავარი სადავო საკითხი დონბასზე კონტროლია, რომლის დაახლოებით 10% კვლავ უკრაინის ხელშია.ზელენსკიმ აღნიშნა, რომ აშშ-ის შუამავლებმა, სტივ ვიტკოფმა და ჯარედ კუშნერმა, მას განუცხადეს: რუსეთს ნამდვილად სურს ომის დასრულება და მან სწორედ ამ საფუძველზე უნდა მოახდინოს კოორდინაცია საკუთარ მომლაპარაკებელთა გუნდთან. თუმცა, ზელენსკიმ აშკარა გახადა, რომ ის ბევრად უფრო პესიმისტურადაა განწყობილი. მან ასევე ურჩია ვიტკოფსა და კუშნერს, არ ეცადონ აიძულონ იგი, "გაყიდოს" მშვიდობის ისეთი ხედვა, რომელსაც მისი ხალხი „წარუმატებელ ისტორიად“ აღიქვამს.ზელენსკიმ Axios-სთან თქვა, რომ „არ იყო სამართლიანი“, როდესაც პრეზიდენტი ტრამპი საჯაროდ მოუწოდებდა უკრაინას და არა რუსეთს, წასულიყო დათმობებზე მშვიდობისთვის. მან აღნიშნა, რომ მიუხედავად იმისა, რომ ტრამპისთვის შესაძლოა უფრო ადვილი იყოს უკრაინაზე ზეწოლა, ვიდრე ბევრად დიდ რუსეთზე, ხანგრძლივი მშვიდობის დამყარების გზა ვლადიმერ პუტინისთვის „გამარჯვების ჩუქება“ არ არის.ტრამპმა ბოლო დღეებში ორჯერ თქვა, რომ დათმობებზე წასვლა ზელენსკის მოვალეობაა. „ვიმედოვნებ, რომ ეს მხოლოდ მისი ტაქტიკაა და არა გადაწყვეტილება“, - განუცხადა ზელენსკიმ Axios-ს.ზელენსკიმ ასევე მადლობა გადაუხადა ტრამპს სამშვიდობო ძალისხმევისთვის და აღნიშნა, რომ კუშნერთან და ვიტკოფთან საუბრები არ მოიცავს იმგვარ ზეწოლას, რასაც ტრამპი საჯაროდ იყენებს. „ჩვენ პატივს ვცემთ ერთმანეთს“, - თქვა მან და დასძინა, რომ ის არ არის ისეთი ადამიანი, რომელიც ზეწოლის ქვეშ ადვილად ტყდება. ზელენსკიმ გაიმეორა, რომ ტერიტორიულ საკითხზე გარღვევის საუკეთესო გზა პუტინთან პირისპირ შეხვედრაა.Axios წერს: ამერიკელმა შუამავლებმა წამოაყენეს წინადადება, რომ უკრაინულმა ძალებმა დატოვონ დონბასის ის ნაწილები, რომლებსაც ამჟამად აკონტროლებენ, და ეს ტერიტორია დემილიტარიზებულ „თავისუფალ ეკონომიკურ ზონად“ იქცეს. ვაშინგტონს არ დაუფიქსირებია პოზიცია იმაზე, თუ რომელი ქვეყნის სუვერენიტეტის ქვეშ იქნება ეს ზონა.ზელენსკი მზად არის განიხილოს ჯარების გაყვანა, თუმცა მოსკოვისგანაც მოითხოვს ჯარების ანალოგიური მანძილით უკან დახევას - და უარყოფს რუსეთის პრეტენზიას ამ ზონაზე სუვერენიტეტის შესახებ. ზელენსკის თქმით, მოლაპარაკებების მეორე რაუნდზე რუსეთის წარმომადგენლები დაჰპირდნენ, რომ გაივლიდნენ კონსულტაციებს მოსკოვთან და ტერიტორიულ საკითხზე დეტალური პოზიციით დაბრუნდებოდნენ.Axios-თან 37-წუთიან სატელეფონო ინტერვიუში ზელენსკიმ აღნიშნა, რომ ვაშინგტონი და კიევი შეთანხმდნენ: ნებისმიერი გარიგება უკრაინელ ხალხს რეფერენდუმზე უნდა წარედგინოს. თუ შეთანხმება ითვალისწინებს უკრაინის მხრიდან დონბასიდან უბრალოდ გასვლას - სუვერენიტეტისა და იქ მცხოვრები მოქალაქეების მსხვერპლად შეწირვას - მისი აზრით, ხალხი ამას მხარს არ დაუჭერს.„ემოციურად, ხალხი ამას არასოდეს აპატიებს. არასოდეს. ისინი არ მაპატიებენ... მე, არ აპატიებენ [აშშ-ს]“, - თქვა ზელენსკიმ და დასძინა, რომ უკრაინელებს „არ ესმით“, რატომ უნდა მოსთხოვონ მათ დამატებითი მიწების დათმობა. „ეს ჩვენი ქვეყნის ნაწილია, ეს ყველაფერი ჩვენი მოქალაქეებია, დროშაა, მიწაა“, - თქვა მან.თუ შეთანხმება უბრალოდ გაყინავს საბრძოლო მოქმედებების ამჟამინდელ ხაზს დონბასში (როგორც ეს დაგეგმილია სხვა ორ რეგიონში, სადაც რუსეთს ტერიტორიები აქვს დაკავებული), ზელენსკი ფიქრობს, რომ უკრაინელი ხალხი ამას მიიღებს. „ვფიქრობ, თუ დოკუმენტში ჩავწერთ... რომ ვრჩებით იქ, სადაც ვართ საკონტაქტო ხაზზე, ხალხი ამას რეფერენდუმზე მხარს დაუჭერს. ეს ჩემი აზრია“. თუმცა, რუსეთი დაჟინებით მოითხოვს მთელი დონბასის დაკავებას ან მოლაპარაკებების გზით, ან ძალით.რუსულ დელეგაციას ახალი ლიდერი ჰყავს, პუტინის მრჩეველი ვლადიმერ მედინსკი. ლიდერის შეცვლის გამო, ზელენსკი შიშობს, რომ რუსული დელეგაცია შეეცდება მოლაპარაკებები უბრალო გაცნობით შეხვედრად აქციოს ან საწყის წერტილს დაუბრუნდეს, რათა რუსეთმა ბრძოლის ველზე დრო მოიგოს. მან ასევე აღნიშნა, რომ პუტინის მსგავსად, მედინსკის უყვარს ფილოსოფიური მსჯელობა ომის „ისტორიულ ფესვებზე“. „ჩვენ არ გვაქვს ამ სისულელეებისთვის დრო. ჩვენ უნდა მივიღოთ გადაწყვეტილება და დავასრულოთ ომი“, - თქვა ზელენსკიმ.მიუხედავად იმისა, რომ პოლიტიკური დიალოგი ნელა მიმდინარეობს, ზელენსკის თქმით, სამხედროებს შორის მოლაპარაკებები აბუ-დაბიში უფრო პროდუქტიული იყო. მხარეები ძირითადად შეთანხმდნენ აშშ-ის მიერ წარმართულ მექანიზმზე, რომელიც დრონების მეშვეობით ცეცხლის შეწყვეტის რეჟიმს გააკონტროლებს, თუკი ასეთი შეთანხმება შედგება. უკრაინას სურს ევროპული ქვეყნების ჩართულობაც, რასაც რუსეთი ეწინააღმდეგება. Axios წერს, მიუხედავად იმისა, რომ სამხედრო ჯგუფმა ჟენევაში სამშაბათს პროგრესს მიაღწია, პოლიტიკური ჯგუფის მოლაპარაკებები „გაიჭედა“. წყაროების თქმით, ეს მედინსკის მიერ წარდგენილი პოზიციების გამო მოხდა. ერთ-ერთმა წყარომ ასევე აღნიშნა, რომ რუსები უკმაყოფილებას გამოთქვამდნენ ზელენსკის ბოლო საჯარო განცხადებების გამო და ამტკიცებდნენ, რომ ის სერიოზულად არ აწარმოებს მოლაპარაკებებს, არამედ ცდილობს რეიტინგის ამაღლებას შესაძლო არჩევნების წინ.ზელენსკიმ თქვა, რომ ჯერ არაფერია გადაწყვეტილი, თუმცა შესაძლებელია ახალი საპრეზიდენტო არჩევნები რეფერენდუმის პარალელურად ჩატარდეს. სექტემბერში მან Axios-ს უთხრა, რომ ომის დასრულების შემდეგ პოლიტიკიდან წავიდოდა, თუმცა სამშაბათს მიცემულ ინტერვიუში მიანიშნა, რომ არჩევნები შესაძლოა ცეცხლის შეწყვეტის მყიფე პერიოდში ჩატარდეს და ასეთ შემთხვევაში ის შესაძლოა კანდიდატი იყოს. „ეს ხალხზე იქნება დამოკიდებული. ვნახოთ, რა სურთ მათ“.მან ასევე აღნიშნა, რომ ამ დროისთვის რუსეთი თანხმდება მხოლოდ ერთდღიან ცეცხლის შეწყვეტაზე კენჭისყრის ჩასატარებლად, ნაცვლად 60 დღისა, რომელიც ზელენსკის აზრით საჭიროა. მან რუსეთის პოზიციას აბსურდული უწოდა და მიიჩნია, რომ ეს იმის ნიშანია, რომ მოსკოვი ნამდვილი მშვიდობისთვის მზად არ არის.24 თებერვალს 4 წელი სრულდება, რუსეთის მიერ უკრაინის წინააღმდეგ სრულმასშტაბიანი ომის დაწყებიდან.

1771393200

„დიდი შეცდომაა, მისცე აგრესორს უფლება, რამე წაიღოს. ეს დიდი შეცდომა იყო თავიდანვე, 2014 წლიდან დაწყებული. და მანამდეც კი, საქართველოზე თავდასხმისა და მისი ნაწილების ოკუპაციის დროს. და კიდევ უფრო ადრე, როდესაც მოხდა ჩეჩნეთის ოკუპაცია - სრული განადგურებითა და მილიონი მსხვერპლით, როგორც დაღუპულებით, ისე დაჭრილებით.ბევრი შეცდომა იქნა დაშვებული. სწორედ ამიტომ, ახლა არ მინდა ვიყო ის პრეზიდენტი, რომელიც გაიმეორებს ჩემი წინამორბედების ან სხვა ადამიანების მიერ დაშვებულ შეცდომებს. მე მხოლოდ უკრაინაზე არ ვსაუბრობ. ვსაუბრობ სხვადასხვა ქვეყნის ლიდერებზე, რომლებმაც დაუშვეს, რომ ისეთი აგრესიული ქვეყანა, როგორიც რუსეთია, მათ ტერიტორიაზე შესულიყო", - წერს ზელენსკი X-ზე.ზელენსკი ხაზს უსვამს, რომ პუტინს „კოცნითა და ყვავილებით“ ვერავინ შეაჩერებს და დათმობის პოლიტიკა მხოლოდ დროს აძლევს რუსეთს სამხედრო ძალების აღსადგენად."რადგან პუტინს კოცნითა და ყვავილებით ვერ შეაჩერებ, მე ეს არასდროს გამიკეთებია, ვფიქრობ, რომ ეს არ არის სწორი გზა. ჩემი რჩევა ყველასთვის - ნუ მოიქცევით ასე პუტინთან. წინააღმდეგ შემთხვევაში, ეს იქნება პირველი ნაბიჯი, შემდეგ კი, ხუთ წელიწადში, ის აღადგენს თავის სამხედრო ძალას, გაზრდის ჯარისკაცების რაოდენობას, მისი არმია იქნება კარგად გაწვრთნილი. რადგან მან ბევრი კარგად გაწვრთნილი ადამიანი დაკარგა. ახლა ის თვეში 30–35 ათას ადამიანს კარგავს", - წერს ზელენსკი.

1771317695

„დიდი მოლაპარაკებებია. ეს იქნება ძალიან მარტივი“, - განაცხადა ტრამპმა და დასძინა, რომ „უკრაინისთვის აჯობებს სწრაფად მიუჯდეს მოლაპარაკებების მაგიდას“.„ეს არის ყველაფერი, რასაც მათ ვეტყვი“, – განაცხადა აშშ-ის პრეზიდენტმა.16 თებერვალს საღამოს უკრაინული დელეგაცია ჟენევაში ჩავიდა.წინა რაუნდის შემდეგ რუსულ მხარეს ცვლილებებია – მას რუსეთის ფედერაციის პრეზიდენტის თანაშემწე ვლადიმერ მედინსკი უხელმძღვანელებს.უკრაინის პრეზიდენტმა ვოლოდიმირ ზელენსკიმ იმედი გამოთქვა, რომ აშშ-სა და რუსეთის მონაწილეობით ომის შესაძლო შეწყვეტის შესახებ მოლაპარაკებების პროცესი რუსეთის მომლაპარაკებელთა გუნდში მომხდარი ცვლილებების გამო არ შეფერხდება.

1771313561

ორგანიზაცია Action on Armed Violence (AOAV) აცხადებს, რომ ინგლისურენოვანი წყაროების მიხედვით, უკრაინაში ფეთქებადი იარაღის გამოყენების შედეგად 2,248 მშვიდობიანი მოქალაქე დაიღუპა და 12,493 დაიჭრა; ამასთან, მნიშვნელოვნად გაიზარდა მსხვერპლის რაოდენობა ცალკეულ ინციდენტზე.თითოეული დარტყმისას საშუალოდ 4.8 მშვიდობიანი მოქალაქე იღუპებოდა ან შავდებოდა, რაც 33%-ით მეტია 2024 წლის მაჩვენებელზე. ყველაზე მძიმე თავდასხმა 24 ივნისს დნიპროში მოხდა, რუსული რაკეტები სამგზავრო მატარებელს, საცხოვრებელ კორპუსებსა და სკოლებს მოხვდა, რის შედეგადაც 21 ადამიანი დაიღუპა, ხოლო 314 დაშავდა, მათ შორის 38 ბავშვი.AOAV-ის აღმასრულებელი დირექტორის იენ ოვერტონის თქმით, ეს ციფრები მოწმობს, რომ „უკრაინა ჯდება თავშეკავების იმ საერთო კოლაფსში, რომელიც ახლა მრავალ ომშია თვალსაჩინო“, ხოლო ომში პროპორციულობისა და დიფერენციაციის პრინციპების პატივისცემა „დაირღვა“.მშვიდობიან მოსახლეობაზე ან სამოქალაქო ინფრასტრუქტურაზე განზრახ თავდასხმა, რომელიც აჭარბებს პირდაპირ სამხედრო უპირატესობას, ომის დანაშაულია. თუმცა, ექსპერტების თქმით, პროპორციულობის პრინციპი კრიტიკულ ზღვარზეა მრავალ კონფლიქტში, მათ შორის ღაზაში, სუდანში, კონგოსა და უკრაინაში.„ჩვენ წლების განმავლობაში ვუყურებდით ამ ეროზიას - ჰომსიდან ალეპომდე, მარიუპოლიდან ღაზამდე. ახლა განსხვავება ისაა, რომ აღარ არსებობს საერთაშორისო წესებზე დაფუძნებული მოქმედი წესრიგი, რომელსაც პასუხისმგებელი პირების დასჯა შეუძლია“, - ამტკიცებს ოვერტონი.2025 წლის განმავლობაში სარაკეტო და დრონებით თავდასხმები უკრაინაში თითქმის ყოველ ღამით ხდებოდა და 2026 წელსაც გაგრძელდა, რის გამოც მილიონობით ადამიანი ელექტროენერგიის, გათბობისა და წყლის გარეშე დარჩა.2025 წლის 9 სექტემბრის ღამეს უკრაინას 805 დრონით და 13 რაკეტით დაესხნენ თავს, რაც ამ ომის განმავლობაში დაფიქსირებული ყველაზე მასშტაბური საჰაერო იერიში იყო.AOAV მშვიდობიანი მოსახლეობის მსხვერპლს მსოფლიო მასშტაბით ფეთქებადი იარაღის გამოყენების ინციდენტების შესახებ ინგლისურენოვანი ცნობების საფუძველზე აკონტროლებს. მიუხედავად იმისა, რომ ეს მეთოდი თანმიმდევრულია, ის მაინც ვერ ასახავს დაღუპულთა და დაჭრილთა ზუსტ რაოდენობას, ნაწილობრივ იმის გამო, რომ მხოლოდ ერთ ენაზე არსებული მედიაგამოცემები აუცილებლად არასრულია.გლობალურად, მშვიდობიან მოსახლეობაში მსხვერპლი 26%-ით შემცირდა 2024 წელს დაფიქსირებული 10-წლიანი მაქსიმუმიდან, რაც ძირითადად ღაზაში ოქტომბრის ცეცხლის შეწყვეტის შეთანხმებით იყო განპირობებული. AOAV-ის მონაცემებით, 2025 წელს ღაზაში მსხვერპლმა 14,024 შეადგინა, რაც წინა წელთან შედარებით 40%-ით ნაკლებია.გასული თვის ბოლოს ისრაელის სამხედრო უწყებამ მიანიშნა, რომ ღაზას ხელისუფლების მიერ გამოქვეყნებული მონაცემები დაღუპულთა შესახებ მეტწილად ზუსტი იყო. უსაფრთხოების სამსახურის წარმომადგენელმა დაადასტურა, რომ 2023 წლის ოქტომბრის შემდეგ 70,000 პალესტინელი დაიღუპა, რაც თანხვედრაშია ღაზას ჯანდაცვის სამინისტროს მონაცემებთან (72,061 დაღუპული და 171,715 დაშავებული).2025 წლის განმავლობაში ჯანდაცვის სამინისტრომ 25,718 დაღუპული და 62,854 დაშავებული პალესტინელი აღრიცხა, რაც ადასტურებს, რომ ინგლისურენოვანი პრესის მონაცემები რეალობაზე ნაკლებია.AOAV-ის თანახმად, 2025 წელს მსოფლიოში სულ 45,358 მშვიდობიანი მოქალაქე დაზარალდა, რაც წინა წლის მაჩვენებელზე (61,353) ნაკლებია. ეს ციფრები მოიცავს 17,589 დაღუპულს და 27,769 დაჭრილს ყველა სახის ფეთქებადი იარაღის გამოყენების შედეგად.ფეთქებადი იარაღით ყველაზე მეტი დაღუპულისა და დაჭრილისთვის პასუხისმგებელი ქვეყანა ისრაელი იყო, რომელიც მცირედით უსწრებდა რუსეთს.2025 წელს ისრაელის მონაწილეობამ მრავალ კონფლიქტში განაპირობა ის, რომ მასზე მოდის ყველა აღრიცხული მსხვერპლის 35%, ხოლო რუსეთზე - 32%. ყველაზე სისხლისმღვრელი შემდეგი ომები იყო სუდანსა (5,438 მსხვერპლი) და მიანმარში (3,178 მსხვერპლი).„უკრაინაში, მიანმარში, ღაზასა და სუდანში გზავნილი ერთია“, - თქვა ოვერტონმა. „როდესაც დაუსჯელობა ნორმად იქცევა, ომის დანაშაულები წყვეტენ შოკის მომგვრელ გამონაკლისად ყოფნას და ომის წარმოების მეთოდად ყალიბდებიან“, - დასძინა მან. 

1771244431