თბილისი (GBC) – „ბრიტანულ-ქართული აკადემიისა“ და „თბილისის ბრიტანული საერთაშორისო სკოლის“ დამფუძნებლები ნათია ჯანაშია და დავით ცეცხლაძე პრემიერისადმი საჯარო მიმართვას ავრცელებენ და ირაკლი კობახიძეს, მისი უფლებამოსილების ფარგლებში, სთხოვენ, ყველა ბერკეტი გამოიყენოს, რათა არ დაუშვას სს „საქართველოს კაპიტალის“ ხელმძღვანელის ირაკლი გილაურის მიერ მათი ბიზნესის საბოლოოდ მიტაცების შესაძლებლობა.
ნათია ჯანაშიას და დავით ცეცხლაძის საჯარო მიმართვას ირაკლი კობახიძისადმი სრულად გთავაზობთ:
„ბატონო პრემიერო,
არაერთი საჯარო პუბლიკაცია მივუძღვენით მე და ჩემმა ოჯახმა სს „საქართველოს კაპიტალისა“ და ირაკლი გილაურის მხრიდან ჩემი და ჩემი ოჯახის მიერ დაფუძნებული სკოლის - „ბრიტანულ-ქართულ აკადემიის“ მიტაცების საკითხს. თავს აღარ შეგაწყენთ იმის თხრობით, თუ როგორ მოტყუებით მიიღო ირაკლი გილაურის კომპანიამ წილის 70% ჩვენს სკოლაში, ხოლო საინვესტიციო ვალდებულება კი დღემდე არ განუხორციელებია.
ვწერდით იმის შესახებ, რომ ირაკლი გილაურის დავალებით, „ინვესტორმა“ ძალის გამოყენებით მოახდინა სკოლის ოკუპაცია, გაყალბებული კრების ოქმის საფუძველზე დირექტორის თანამდებობიდან გაათავისუფლა ნათია ჯანაშია და დანიშნა სკოლის დირექტორობისთვის შეუფერებელი კანდიდატი, რომელიც არათუ ელემენტარულ საკვალიფიკაციო და კანონით განსაზღვრულ მოთხოვნებს ვერ აკმაყოფილებს, არამედ მისი კანდიდატურა სრულად ეწინააღმდეგება „ოჯახური ღირებულებებისა და არასრულწლოვანის დაცვის შესახებ“ კანონს.
გვსურს, თქვენი ყურადღება მივაპყროთ იმ გარემოებას, რომ ჩვენსა და სკოლის მიმართ განხორციელებული უკანონობა დღესაც გრძელდება. გილაურის მიერ ხელდასხმული პირები სკოლის დამფუძნებლებსა და ლეგიტიმურ დირექტორს არ გვაძლევენ სკოლის ტერიტორიაზე შესვლის უფლებას; უკანონოდ ეუფლებიან სკოლაში დარჩენილ ჩვენს პირად ნივთებს და ხელყოფენ საკუთრების უფლებას; ჩვენზე შურისძიების მიზნით ახორციელებენ დისკრიმინაციას ჩვენი არასრულწლოვანი შვილების მიმართ, რომლებიც აკადემიის მოსწავლეები არიან და რომელთა მიმართ ირღვევა ბავშვთა თანასწორობის უფლება, მათ მიმართ, აგრეთვე, ადგილი აქვს ფსიქოლოგიურ ზეწოლას; სკოლის არალეგიტიმური მენეჯმენტი უკანონოდ ათავისუფლებს თანამშრომლებს დაკავებული თანამდებობებიდან, რისი რეალური მიზეზიც მათ მიერ სკოლის ოკუპაციის წინააღმდეგ გამოხატული მშვიდობიანი პროტესტია.
ზემოთ აღნიშნული უკანონობის ფონზე, თქვენთან აუდიენციით და საქართველოში საინვესტიციო გარემოზე საუბრით, ირაკლი გილაური ცდილობს, შეიქმნას კეთილსინდისიერი მეწარმის იმიჯი, რაც სრულად ეწინააღმდეგება მის მიერ განხორციელებულ ქმედებებს. გვერწმუნეთ, ირაკლი გილაური არის ნაციონალი, რომელიც ზუსტად ისე ექცევა ბიზნესპარტნიორებს, როგორც ნაცები ექცეოდნენ 9 წლის განმავლობაში. გილაურის ფსიქოლოგია, მისი მიდგომები და სხვისი ქონების მიტაცებისკენ სწრაფვა არ შეცვლილა, ის იყო და რჩება მიმტაცებელ ნაციონალ „მეწარმედ“. მისი ერთადერთი მიზანია, როგორმე თავი აარიდოს მოსალოდნელ სისხლისსამართლებრივ პასუხისმგებლობას, რომელიც სამართლიანად ემუქრება მის მიერ ჩადენილი ქმედებების გამო. გილაურის მიერ შეხვედრაზე წარმოდგენილი პირები, რეალურად სს „საქართველოს კაპიტალის“ მენეჯმენტის წევრები არიან და არა ინვესტორები, როგორც გილაური ცდილობს, რომ წარმოაჩინოს ისინი. გარდა ამისა, დიდ ბრიტანეთში რეგისტრირებული კომპანია “Georgia Capital” PLC გილაურისთვის მხოლოდ საშუალებაა, რომლითაც ცდილობს გავლენა მოახდინოს ქართულ საზოგადოებასა და ბიზნესწრეებზე, რომ თითქოს კეთილსინდისიერი „ინვესტორია“, რომლის მიერ მართული კომპანიის აქციები დაშვებულია ლონდონის საფონდო ბირჟაზე. რეალურად კი საქართველოში რეგისტრირებული კომპანია სს „საქართველოს კაპიტალით“ ოპერირებს, რომელიც დიდ ბრიტანეთში რეგისტრირებული კომპანიის სახელს ნდობის მოსაპოვებლად იყენებს და ცდილობს ყოველგვარი პასუხისმგებლობა აარიდოს ლონდონის საფონდო ბირჟაზე დაშვებულ ბრიტანულ კომპანიას მაშინ, როდესაც ორივე კომპანიას ერთი და იგივე გუნდი მართავს და ყველა უკანონო ქმედების ჩადენაში ერთობლივად მონაწილეობს. ყველა ხრიკი და პიარ აქტივობა, რასაც გილაური მიმართავს, მხოლოდ პოტენციური პარტნიორების შეცდომაში შეყვანასა და მის მიერ განხორციელებული უკანონო ქმედებებისათვის შესაძლო სისხლისსამართლებრივი პასუხისმგებლობისაგან თავის არიდებას ემსახურება. კარგად არის რა, ეს ყველაფერი ჩვენთვის ნაცნობი, ჩვენი ბრიტანელი იურისტები ამჟამად აქტიურად მუშაობენ, რომ ირაკლი გილაურისა და მისი კომპანიის მიმართ როგორც სამოქალაქო, ისე სისხლის სამართლის პასუხისმგებლობა დავაყენოთ დიდ ბრიტანეთში იმ უკანონობის გამო, რაც ჩვენი კომპანიის მიმართ ჩაიდინეს.
გთხოვთ, თქვენი უფლებამოსილების ფარგლებში, გამოიყენოთ ყველა შესაძლებლობა, რომ ნაციონალ ირაკლი გილაურს არ მიეცეს ჩვენი ბიზნესის საბოლოოდ მიტაცების შესაძლებლობა“, – ნათქვამია საჯარო მიმართვაში, რომელსაც ხელს „ბრიტანულ-ქართული აკადემიისა“ და „თბილისის ბრიტანული საერთაშორისო სკოლის“ დამფუძნებლები ნათია ჯანაშია და დავით ცეცხლაძე აწერენ ხელს.
