თბილისი (GBC) – საქართველოს ბანკისა“ და „თიბისის“ აქციების გაუფასურებაც „უცხოური გამჭვირვალობის შესახებ კანონის“ მიღებას აბრალებს ეკონომისტი სოსო ბერიკაშვილი. ამის შესახებ ეკონომისტმა „პალიტრანიუსის“ გადაცემაში „რეზიუმე“ ისაუბრა.
„გუშინ მიიღეს კანონი საბოლოოდ, სანამ ახლა პრეზიდენტის ვეტო იქნება, მერე დაძლევა... ამ ყველაფრის შედეგია, აქციების ფასის მკვეთრი დაცემა. ეგ იმას ნიშნავს, რომ ინვესტორები უყურებენ ამ ყველაფერს, ინვესტორები აფასებენ ეკონომიკურ სიტუაციას ქვეყანაში და ეს არის შეფასების შედეგი, ეს არის შედეგი იმისა რომ ინვესტორები იმაზე ნაკლებად აფასებენ საინვესტიციო გარემოს საქართველოში, ვიდრე აქამდე აფასებდნენ,“ - განაცხადა ეკონომისტმა.
ბერიკაშვილი ლარის კურსის გაუფასურების საკითხსაც შეეხო. მისი თქმით ლარის კურსის რყევები სავარაუდოდ „პანიკის“ ბრალია.
„ლარის გაუფასურება, ამ ეტაპზე დიდი ალბათობით, მხოლოდ მოლოდინების და პანიკის გამოა და ეგ თავისთავად დარეგულირდება თუ სხვა ფაქტორები დარეგულირდა, მაგრამ ეს ფაქტორები ვერ დარეგულირდება თუ გააგრძელეს ამ კურსის საბოლოო გატარება და გატანა,“ - ამბობს სოსო ბერიკაშვილი.
შეგახსენებთ რომ, ლონდონის სავაჭრო ბირჟაზე „საქართველოს ბანკის" (BGEO) აქციების ფასი 12.08%-ით, TBC-ის 14,92%-ით, ხოლო „საქართველოს კაპიტალის“ (CGEO) აქციების ღირებულება 8.8%-ით შემცირდა.
რაც შეეხება ლარს, იგი დოლართან მიმართებით 4.5 თეთრზე მეტით გაუფასურდა. გუშინ ეროვნული ბანკის მიერ დადგენილი კურსით, 1 აშშ დოლარის ოფიციალური ღირებულება 2.6866 ლარი იყო, დღეს კი 2.7323 ლარი გახდა.
