თბილისი (GBC) - კოალიცია ცვლილებებისთვის ლიდერები: ზურა ჯაფარიძე, ნიკა გვარამია და ნიკანორ მელია „ნაციონალური მოძრაობის“ საქმიანობის შემსწავლელ დროებით კომისიაზე დაიბარეს.
ზურა ჯაფარიძე წერს, ის კომისიაზე 4 აპრილს არის დაბარებული.
„წულუკიანი მიბარებს საგამოძიებო კომისიაზე 4 აპრილს... მანდ მისვლა მაგათი ლეგიტიმურობის აღიარებაა", - წერს ზურა ჯაფარიძე Facebook-ზე.
ნიკა მელიას რაც შეეხება, ის კომისიისგან მიღებულ შეტყობინებას აქვეყნებს: „ბატონო ნიკანორ, გაცნობებთ, რომ კომისიის მიერ მოთხოვნილია თქვენ მიერ ახსნა-განმარტების მიცემა 2004-2012 წლებში ადამიანის უფლებების დაცვის სფეროში არსებული ვითარებისა და, მომდევნო წლებში, შიდა და საგარეო პოლიტიკური პროცესების შესახებ, რისთვისაც მოწვეული ბრძანდებით მიმდინარე წლის 11 აპრილს, 13.00 საათზე.
აქვე შეგახსენებთ, რომ კომისიის წინაშე გამოცხადებაზე უარი წარმოადგენს სისხლის სამართლის დანაშაულს და ამგვარი ქმედება ისჯება საქართველოს კანონმდებლობით დადგენილი წესით.
პატივისცემით, საპარლამენტო კომისიის სამდივნოს ხელმძღვანელი ნინო ჭიპაშვილი“, - ნათქვამია ნიკა მელიასათავის გაგზავნილ შეტყობინებაში.
„ნაციონალური მოძრაობის“ საქმიანობის შემსწავლელ დროებით კომისიისგან მიღებულ შეტყობინებას აქვეყნებს ნიკა გვარამიაც სადაც ვკითხულობთ: „ბატონო ნიკა, ვინაიდან ტელეფონს მითიშავთ, გაცნობებთ, რომ პარლამენტის კომისიის მიერ მოთხოვნილია თქვენ მიერ ახსნა-განმარტების მიცემა 2004-2012 წლებში ადამიანის უფლებების დაცვის სფეროში არსებული ვითარებისა და, მომდევნო წლებში, შიდა და საგარეო პოლიტიკური პროცესების შესახებ, რისთვისაც მოწვეული ბრძანდებით მიმდინარე წლის 8 აპრილს, 10.00 საათზე.
აქვე შეგახსენებთ, რომ კომისიის წინაშე გამოცხადებაზე უარი წარმოადგენს სისხლის სამართლის დანაშაულს და ამგვარი ქმედება ისჯება საქართველოს კანონმდებლობით დადგენილი წესით“.
დღეს, 2 აპრილს, თბილისის საქალაქო სასამართლოში „ლელო - ძლიერი საქართველოს“ ერთ-ერთი ლიდერის, მამუკა ხაზარაძის საქმეზე სხდომა მიმდინარეობს, რომელიც გულისხმობს "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას".
სახელმწიფო ბრალდება ბრალდებულის მიმართ 50 000-ლარიანი გირაოს გამოყენებას ითხოვს, დაცვის მხარე კი ხაზარაძის აღკვეთის ღონისძიების გარეშე დატოვებას.
მამუკა ხაზარაძე საქართველოს პარლამენტის დროებითი საგამოძიებო კომისიის სხდომაზე 25 მარტს ახსნა-განმარტებისთვის იყო დაბარებული, სადაც ის არ გამოცხადდა. აღნიშნულის შემდეგ, ხაზარაძემ ჩვენება მაგისტრატი მოსამართლის წინაშე მისცა.
მამუკა ხაზარაძეს ბრალდება სისხლის სამართლის კოდექსის 349-ე მუხლით წარედგინა, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს. აღნიშნული ქმედება ისჯება ჯარიმით, ან თავისუფლების აღკვეთით ვადით ერთ წლამდე, თანამდებობის დაკავების, ან საქმიანობის უფლების ჩამორთმევით ვადით სამ წლამდე.
