თბილისი (GBC) – „ქართული ოცნების“ 86–მა დეპუტატმა არცერთის წინააღმდეგ მესამე მოსმენით დააკანონა ამერიკული „უცხოური აგენტების რეგისტრაციის აქტის“ (FARA), მათი მტკიცებით, ქართული ანალოგი. „ოცნებამ“ დღესვე, 1–ელ აპრილს მიიღო ცვლილება, რომლითაც საქართველოს სისხლის სამართლის კოდექსს „სამშობლოს ღალატის“ მუხლი დაემატა.

უცხოური დაფინანსებით მოქმედი ქართული არასამთავრობო და მედიაორგანიზაციები აცხადებენ, რომ აშშ-ში მოქმედი FARA დამოუკიდებელი არასამთავრობო ორგანიზაციების და თავისუფალი მედიის საქმიანობას არ უპირისპირდება, საქართველოში კი სამოქალაქო სექტორის წინააღმდეგ მიღებული „რუსული კანონის“ გადაფუთვა სურთ.

მესამე მოსმენის შემდეგ პარლამენტი კანონებს ხელმოსაწერად უგზავნის მიხეილ ყაველაშვილს, რომელიც „ქართული ოცნების“ ხმოსნებმა მეექვსე პრეზიდენტად აირჩიეს დეკემბერში.