თბილისი (GBC) – რუსეთის პრეზიდენტმა ვლადიმირ პუტინმა უკრაინაში გაეროს ეგიდით დროებითი მმართველობის შემოღების ინიციატივა წამოაყენა. ამ იდეით იგი მიზნად ისახავს „ხელისუფლებაში ქმედუნარიანი და ხალხის ნდობით აღჭურვილი ხელისუფლების მოყვანას“, რომელთანაც შემდეგ რუსეთი სამშვიდობო მოლაპარაკებებს აწარმოებს.
„შეიძლება ეს იყოს გაეროს ეგიდით, აშშ, ევროპის ქვეყნებთან ერთად, რა თქმა უნდა, ჩვენ პარტნიორებთან და მეგობრებთან ერთად განვიხილავთ უკრაინაში დროებითი მმართველობის შემოღების შესაძლებლობას. იმისათვის, რომ დემოკრატიული არჩევნები ჩავატაროთ“, – განაცხადა პუტინმა ატომური წყალქვეშა კრეისერის „არხანგელსკის“ მეზღვაურებთან შეხვედრაზე, რომელიც ხუთშაბათს საღამოს გაიმართა.
მისივე თქმით, უკრაინის ახალ ხელისუფლებასთან გაფორმებული დოკუმენტები „მსოფლიო აღიარებას მოიპოვებს და საიმედო იქნება“, ვინაიდან დღეს რუსეთისთვის გაუგებარია, ვისთან დებს შეთანხმებას. პუტინმა აღნიშნა, რომ გასულ წელს უკრაინაში საპრეზიდენტო არჩევნები არ ჩატარებულა და ამიტომ ვოლოდიმირ ზელენსკი არ ითვლება სახელმწიფოს ლეგიტიმურ მეთაურად. „თუ ის არალეგიტიმურია, ყველა დანარჩენიც იგივეა“, – განმარტა პუტინმა.
„თუმცა, ეს არ არის ერთადერთი ვარიანტი, სხვა ვარიანტებიც არსებობს, მაგრამ ეს ერთ–ერთი ვარიანტია, რომლის პრაქტიკაც არსებობს გაეროს მუშაობაში“, – აღნიშნა რუსეთის ლიდერმა.
პუტინი ირწმუნება, რომ ფრონტის მთელ ხაზზე სტრატეგიული ინიციატივა მის ხელშია და უკრაინის შეიარაღებულ ძალებს განადგურებით დაემუქრა.
უკრაინაში საერთაშორისო მმართველობის შემოღებაზე პუტინის ინიციატივას აშშ–შიც მოყვა რეაქცია და პრაქტიკულად უარი თქვეს ამ ვერსიაზე. თეთრი სახლის ეროვნული უსაფრთხოების საბჭოს წარმომადგენელმა რუსებს შეახსენა, რომ უკრაინაში მმართველობის ფორმატს ქვეყნის კონსტიტუცია და მისი ხალხი განსაზღვრავს.
