თბილისი (GBC) - რუსეთის „პირდაპირი ინვესტიციების ფონდის“ ხელმძღვანელი, რუსეთის პრეზიდენტის სპეციალური წარმომადგენელი უცხო ქვეყნებთან ეკონომიკური თანამშრომლობის საკითხებში, კირილ დმიტრიევი აცხადებს, რომ მოსკოვი და ვაშინგტონი განიხილავენ რუსეთსა და აშშ-ს შორის პირდაპირი საავიაციო მიმოსვლის აღდგენას.
„ჩვენი საელჩო და რუსეთის საგარეო საქმეთა სამინისტრო აშშ-თან მუშაობს მრავალ მნიშვნელოვან საკითხზე, მათ შორის პრაქტიკულ საკითხებზე რუსეთის მოქალაქეებისთვის. აქტიურად მიმდინარეობს მუშაობა პირდაპირი საავიაციო მიმოსვლის აღდგენაზე და იმედი გვაქვს, წინ წავიწევთ ამ საკითხში“, – განაცხადა დმიტრიევმა, რომელიც საუდის არაბეთში აშშ-თან მოლაპარაკებაზე იმყოფებოდა.
დმიტრიევმა ვაშინგტონში ჟურნალისტებთან საუბრისას ასევე აღნიშნა, რომ ტრამპის ადმინისტრაციას „ესმის რუსეთის შეშფოთება“.
„ერთ-ერთი მთავარი თემაა რუსულ-ამერიკული ურთიერთობების აღდგენა, დიალოგი, რომელიც შეწყდა ჯო ბაიდენის ადმინისტრაციის დროს. ჩვენ უდავოდ ვხედავთ, რომ ბევრი აქტორი, სხვადასხვა ქვეყანა ცდილობს ამ დიალოგის ჩაშლას. განსხვავება ტრამპისა და ბაიდენის ადმინისტრაციებს შორის ის არის, რომ ტრამპის ადმინისტრაცია ისმენს რუსეთის პოზიციას, ესმის რუსეთის პრობლემები“, – აღნიშნა დმიტრიევმა.
