თბილისი (GBC) – „ხალხის ძალის“ დეპუტატმა გურამ მაჭარაშვილმა ოთხშაბათს განაცხადა: "ჩვენთვის მნიშვნელოვანია ის, რომ ვინც გვაფასებს, იმ ფორმატებში მივიღოთ მონაწილეობა". ამით მაჭარაშვილი ევროკავშირის საბჭოს პოლონეთის თავმჯდომარეობის განცხადებას გამოეხმაურა.
მისი თქმით, პოლონეთს ახლა არ უნდა ჰქონდეს იმის დრო, რომ საქართველოში მიმდინარე პროცესები შეაფასოს.
„მე არ მგონია, პოლონეთს ახლა უნდა ჰქონდეს დრო, რომ საქართველოში მიმდინარე პროცესები შეაფასოს. გამომდინარე იქიდან, რომ თავად ევროკავშირში არის ბიუროკრატიაში სერიოზული პრობლემები. ევროკავშირს პირდაპირ ადანაშაულებს ამერიკის შეერთებული შტატების პრეზიდენტი უსამართლობაში და აბა, გააკრიტიკოს ამერიკის პრეზიდენტი, პოლონეთი ხომ არის ევროკავშირის წევრი ქვეყანა? ევროკავშირი უსამართლოდ ექცევა ამერიკას, ეს პირდაპირ თქვა ამერიკის პრეზიდენტმა და რატომ არაფერს ამბობს? ამიტომ ჩვენთვის, ბუნებრივია, მნიშვნელოვანია ის, რომ ვინც ჩვენ გვაფასებს, აი, იმ ფორმატებში მივიღოთ მონაწილეობა,“ - განაცხადა გურამ მაჭარაშვილმა.
ევროკავშირის საბჭოს პოლონეთის თავმჯდომარეობამ X-ზე გაავრცელა განცხადება სადაც აღნიშნულია, რომ ევროკავშირისა და პარტნიორი ქვეყნების მინისტრების შეხვედრის დროს საქართველოსთვის ცარიელი სკამი იყო დარჩენილი.
„ზოგად საკითხთა საბჭოს (GAC) არაფორმალური შეხვედრის პირველ სესიაში ევროპულ საქმეთა მინისტრებმა და გაწევრიანების მსურველმა პარტნიორმა ქვეყნებმა მიიღეს მონაწილეობა. საქართველოსთვის სკამი ცარიელი იყო დარჩენილი“, - ვკითხულობთ განცხადებაში.
