თბილისი (GBC) - ჰორმუზის სრუტის გახსნის მნიშვნელობაზე საუბრისას, 16 მარტს, აშშ–ის პრეზიდენტმა დონალდ ტრამპმა NATO-ს მოკავშირეები გააფრთხილა, რომ მათ „ძალიან ცუდი“ მომავალი ელოდებათ, თუ ბლოკირებული სრუტის გახსნაში არ დაეხმარებიან. ამის შესახებ The Telegraph წერს.
აშშ-ის პრეზიდენტმა განაცხადა, რომ ნავთობზე ძლიერად დამოკიდებულმა ქვეყნებმა უნდა გაითვალისწინონ მისი მოწოდება სავაჭრო გზაზე სამხედრო ხომალდების გაგზავნის შესახებ – ეს არის მოთხოვნა, რომელზეც სერ კირ სტარმერმა ამ დრომდე უარი თქვა.
„თუ რეაგირება არ იქნება, ან თუ ის უარყოფითი იქნება, ვფიქრობ, ეს ძალიან ცუდი იქნება NATO-ს მომავლისთვის“, - განაცხადა მან.
ტრამპმა განსაკუთრებით გამოყო გაერთიანებული სამეფო და Financial Times-თან საუბრისას აღნიშნა: „როდესაც მათ მოსვლა ვთხოვე, მათ ეს არ ისურვეს“.
მან მოუწოდა ბრიტანეთს, ჩინეთს, საფრანგეთს, იაპონიასა და სამხრეთ კორეას, შეუერთდნენ „გუნდურ ძალისხმევას“ ტანკერების გასაცილებლად ჰორმუზის სრუტის გავლით, რომელიც მსოფლიო ნავთობის მეხუთედის გამტარია.
სასიცოცხლო მნიშვნელობის სრუტე ირანის მხრიდან მუდმივი თავდასხმების წინაშე აღმოჩნდა 28 თებერვალს აშშ-ის და ისრაელის სამხედრო კამპანიის დაწყების შემდეგ, რამაც ნაოსნობა შეაჩერა და გლობალური ეკონომიკური რყევები გამოიწვია.
პრემიერ-მინისტრმა სრუტის გახსნის მნიშვნელობა ტრამპთან კვირას ღამით გამართული სატელეფონო საუბრისას განიხილა. დაუნინგ სტრიტის წარმომადგენლის თქმით, იგი ასევე ესაუბრა კანადის პრემიერ-მინისტრს, მარკ კარნის.
იაპონიამ და ავსტრალიამ განაცხადეს, რომ ისინი არ გაგზავნიან სამხედრო ხომალდებს, ხოლო სამხრეთ კორეამ აღნიშნა, რომ აშშ-ის პრეზიდენტის თხოვნას ყურადღებით განიხილავს.
ტრამპმა მიანიშნა, რომ შესაძლოა გადადოს ამ თვეში დაგეგმილი ვიზიტი ჩინეთში, თუ პეკინი დახმარებას არ გაუწევს მას შემდეგ, რაც ირანმა განაცხადა, რომ ჩინურ გემებს სრუტით სარგებლობის ნებას დართავდა.
